មហាជននិយមតាមដានវិស័យសិល្បៈ ច្បាស់ជាបានស្គាល់មកហើយអ្នកនាង ផាន់ ផាត់ណា ដែលជាតារាសម្តែងស្រីមានប្រជាប្រិយភាពមួយរូបក្នុងវិស័យភាពយន្ត និង ចម្រៀងកាយវិការ។ លើសពីនោះ អ្នកនាង ផាន់ ផាត់ណា ក៏ធ្លាប់ជាតារាបង្ហាញម៉ូដផងដែរ។
បើគិតមកដល់ពេលនេះ រយៈពេលប្រមាណជាង ១០ ឆ្នាំមកហើយ លើវិថីសិល្បៈរបស់អ្នកនាង ផាន់ ផាត់ណា ប៉ុន្តែតារាស្រីរូបនេះនៅតែបន្តដំណើរយ៉ាងរលូន បើទោះជាបច្ចុប្បន្នអ្នកនាងមានតួនាទីមើលថែកូនប្រុសផង និង ធ្វើការងារផងក្តី។
ងាកទៅកាន់ជីវិតឯកជនឯណោះវិញ អ្នកគាំទ្រច្បាស់ជាបានជ្រាបហើយ អ្នកនាង ផាន់ ផាត់ណា គឺមានកូនប្រុសមួយរូប ដោយកូនប្រុសរបស់តារាស្រីរូបនេះមានឈ្មោះ You Jun។ មកដល់ពេលនេះ កូនប្រុសរបស់អ្នកនាង ផាន់ ផាត់ណា មានអាយុ ៦ ឆ្នាំហើយ។
កន្លងមកអ្នកនាង ផាន់ ផាត់ណា ធ្លាប់បានបង្ហាញវត្តមានរបស់ស្វាមីអ្នកនាង ប៉ុន្តែប៉ុន្មានឆ្នាំចុងក្រោយនេះ គេពុំសូវបានឃើញអ្នកនាងបង្ហាញពីស្វាមីទៀតនោះទេ ពោលគឺមានតែវត្តមានរបស់អ្នកនាង និង កូនប្រុសប៉ុណ្ណោះ។ យ៉ាងណាក៏ដោយ បើក្រឡេកទៅមើលជីវិតម្តាយកូនរបស់អ្នកនាង ផាន់ ផាត់ណា គឺពោរពេញដោយសុភមង្គល ដោយអូន You Jun មានវ័យទើបតែ ៦ ឆ្នាំទេ ប៉ុន្តែមានការចេះដឹង គោរពចាស់ទុំ និង ចេះសម្តែងដូចអ្នកម្តាយយ៉ាងដូច្នោះ៕
