ថ្មីៗនេះ សារព័ត៌មានក្រៅប្រទេសមួយបានលើកយកពីរឿងរ៉ាវដ៏គួរឱ្យអាណិតរបស់ស្រ្តីជនជាតិតៃវ៉ាន់ម្នាក់ ដែលបានកើតមហារីកដំណាក់កាលចុងក្រោយ ប៉ុន្តែត្រូវមកចាញ់បោកវគ្គព្យាបាលផ្លូវចិត្ត រហូតដល់ថ្នាក់អស់លុយពីខ្លួន ថែមទាំងអស់ផ្ទះទៀត។
តាមព័ត៌មានបានឱ្យដឹងថា រឿងរ៉ាវបានកើតឡើងតាំងពីឆ្នាំ ២០១៣ កន្លងទៅ ដោយស្រ្តីខាងលើនេះត្រូវបានមនុស្ស ២ នាក់ ល្បួងឱ្យចូលសិក្សាវគ្គអភិវឌ្ឍន៍ចិត្តវិញ្ញាណ ដើម្បីជួយព្យាបាលជំងឺមហារីកដំណាក់កាលចុងក្រោយដែលនាងកំពុងតែកើត។ ក្រោយមកនៅឆ្នាំ ២០២១ កូនប្រុសនាងក៏បានចូលរួមជាមួយដែរ។ នៅក្នុងវគ្គសិក្សានេះ ស្រ្តីខាងលើត្រូវបានគេបង្ខំឱ្យធ្វើរឿងមិនគប្បីជាច្រើន ដូចជាលុតជង្គង់នៅតាមផ្លូវ រៀបការជាមួយស្រ្តីដូចគ្នាហើយលែងលះវិញ លើសពីនេះសមាជិកនៅក្នុងវគ្គនេះក៏បានទម្លាយដែរថា មានទាំងការលាងជើងឱ្យគ្នា និង ការបោកក្បាលជាមួយជញ្ជាំងទៀតផង។
មេដឹកនាំវគ្គនេះ បានគំរាមស្រ្តីខាងលើថា បើសិនជាមិនធ្វើតាមខ្លួនទេ នាងនឹងត្រូវស្លាប់ដោយវេទនា គ្រួសារនាងនឹងបែកបាក់គ្នា ទោះបីព្រះក៏ជួយមិនបានដែរ។ ដោយឡែក នៅក្នុងវគ្គសិក្សានេះស្រ្តីជាម្តាយបានបង់ប្រាក់អស់ ៦.៨ លានដុល្លារតៃវ៉ាន់ រីឯកូនប្រុសអស់ ៦.៥ ដុល្លារតៃវ៉ាន់ ពោលគឺដល់ថ្នាក់លក់ផ្ទះយកមកបង់ឱ្យគេទៀតផង។
លុះក្រោយ ទាំងម្តាយទាំងកូនក៏បានទៅពិភាក្សាជាមួយផ្នែកច្បាប់ ទើបដឹងខ្លួនថាត្រូវគេបោកប្រាស់ ក៏ប្រញាប់ដាក់ពាក្យបណ្តឹង ហើយតុលាការក៏បានកាត់ក្តីឱ្យមេដឹកនាំវគ្គសិក្សាសងសំណងប្រមាណ ១៤ លានដុល្លារតៃវ៉ាន់មកកាន់ម្តាយ និង កូនទាំងពីរនាក់នេះវិញ៕
