មានរឿងរ៉ាវដ៏គួរឱ្យហួសចិត្តមួយបានកើតឡើងនៅឯប្រទេសឥណ្ឌា ដោយមានបុរសចំណាស់ម្នាក់បានក្លែងបន្លំធ្វើជាស្លាប់ ឱ្យញាតិមិត្តរៀបចំពិធីបុណ្យសពឱ្យដូចមែនទែន ព្រោះតែចង់ដឹងថានរណាដែលស្រឡាញ់រាប់អានខ្លួនពិតប្រាកដ។
តាមព័ត៌មានបានឱ្យដឹងថា បុរសចំណាស់ខាងលើនេះមានវ័យ ៧៤ ឆ្នាំ ជាអតីតទាហានជើងអាកាស និង ជាអ្នករស់នៅក្នុងភូមិ Konchi ក្នុងទីក្រុង Bihar។ នៅថ្ងៃមួយលោកតាបាននឹកឃើញ និង ចង់ដឹងថាតើមានអ្នកណាខ្លះដែលស្រឡាញ់រាប់អានលោកតាយ៉ាងពិតប្រាកដ? ទើបកើតគំនិតក្លែងខ្លួនធ្វើស្លាប់ និង ឱ្យញាតិមិត្តរៀបចំពិធីបុណ្យសពឱ្យដូចមែនទែន ព្រមទាំងឱ្យដើរប្រាប់អ្នកនៅក្នុងភូមិថាលោកតាបានស្លាប់បាត់ហើយ។
យ៉ាងណាមិញ អ្នកភូមិជាច្រើននាក់ក៏បានជឿពិតមែន ហើយក៏បានចូលរួមបុណ្យសពរបស់លោកតា ដោយបង្ហាញការសោកស្តាយចេញពីចិត្ត តែនៅសុខៗស្រាប់តែលោកតាងើបចេញពីមឈូសមកពញ្ញាក់អ្នកភូមិទាំងអស់នោះ ហើយប្រាប់ថានេះគ្រាន់តែជាការពិសោធក្តីស្រឡាញ់ទេ លោកតាមិនបានស្លាប់ឡើយ។ ដោយឡែក ចុងក្រោយលោកតាក៏បានរៀបចំពិធីជប់លៀងមួយឱ្យអ្នកភូមិផងដែរ ដើម្បីលួងចិត្តសុំទោសដែលលោកតាបាន Prank បែបនេះ៕
