ខូចចិត្តនឹងសម្រស់ពីកំណើត នារីកូរ៉េម្នាក់ជះលុយជិត ២០ ម៉ឺនដុល្លារកែសម្ផស្សជាង ៤០០ ដង រហូតពេទ្យអង្វរឱ្យឈប់កែថែម

ថ្មីៗនេះ នារីជនជាតិកូរ៉េម្នាក់ បានទម្លាយពីបទពិសោធកែសម្ផស្សរបស់ខ្លួនថាធ្លាប់ឆ្លងកាត់មុខកាំបិតជាង ៤០០ ដងមកហើយ តែនៅតែចង់កែទៀត រហូតដល់គ្រូពេទ្យដាស់តឿនឱ្យឈប់។

នារីរូបនេះបានរៀបរាប់ឱ្យដឹងថា នាងចាប់ផ្តើមកែសម្ផស្សលើកដំបូងកាលពីឆ្នាំ ២០១០ ដោយសារតែត្រូវគេមើលងាយមុខមាត់ពេលដែលរៀបចូលរៀនមហាវិទ្យាល័យ។ លុះនាងអាយុប្រហែលជាខ្ទង់ ២០ ក្រាស់ ក៏ត្រូវសង្សារចាស់មើលងាយមុខមាត់នាងទៀត ធ្វើឱ្យនាងខូចចិត្តជាខ្លាំង ហើយក៏តាំងចិត្តកែសម្ផស្សមួយទំហឹង ដើម្បីកែប្រែមុខមាត់ខ្លួនឯងទាំងអស់តែម្តង។

នាងបានឱ្យដឹងថា ក្នុងរយៈពេល ១៥ ឆ្នាំមកនេះ នាងបានចំណាយប្រាក់អស់ប្រមាណជិត ២ សែនដុល្លារហើយចំពោះការវះកាត់កែសម្ផស្ស ដូចជាការវះកាត់ត្របកភ្នែកពីរជាន់ ការកែភ្នែក កែច្រមុះ កែបបូរមាត់ កែត្រចៀក ចាក់ខ្លាញ់បំពេញថ្ងាស កែទម្រង់មុខ ចាក់ Filler បបូរមាត់ ស្មា ក​ និង ត្រគាក ការចាក់បញ្ចូលកោសិកាតាមសរសៃឈាម និង ការព្យាបាលស្បែកជាច្រើនទៀត។ នាងបានឱ្យដឹងថា នាងមិនស្តាយក្រោយនោះទេ នាងពេញចិត្តចំពោះមុខមាត់នាងណាស់ ហើយមានតែចង់កែថែមទៀត តែត្រូវគ្រូពេទ្យហាមថាមិនគួរធ្វើទៀតឡើយ និង ឱ្យនាងគួរតែខំប្រឹងថែរក្សារូបរាង និង មុខមាត់នាពេលបច្ចុប្បន្នឱ្យល្អវិញទៅ៕