នៅតាមបណ្តាញសង្គមរបស់ចិន បានផ្ទុះការវែកញែកហួសចិត្តទៅរឿងរ៉ាវរបស់នារីម្នាក់ ដែលរំសាយមង្គលការចោល តែមិនព្រមឱ្យថ្លៃទឹកដោះទៅខាងប្រុសវិញឱ្យគ្រប់ចំនួនទេ ដោយទុកមួយចំនួនជាថ្នូរថ្លៃឱបគ្នានៅពេលថត Pre-Wedding។
តាមព័ត៌មានបានឱ្យដឹងថា នារីខាងលើនេះបានចាប់ផ្តើមទាក់គ្នាជាមួយនឹងខាងប្រុសកាលពីឆ្នាំ ២០២៤ កន្លងទៅ តាមរយៈមេអណ្តើកមួយរូប។ ពួកគេក៏បានភ្ជាប់នៅខែមករា ឆ្នាំ ២០២៥ ហើយក៏មានគម្រោងរៀបការនៅខែវិច្ឆិកានេះ ដោយខាងប្រុសបានឱ្យថ្លៃទឹកដោះខាងស្រីប្រហែលជិត ៣ ម៉ឺនដុល្លារ។ គម្រោងរៀបការត្រូវបានរៀបចំហើយអស់ មានទាំងការថត Pre-Wedding ការកក់កន្លែង និង ហៅភ្ញៀវ តែនៅសុខៗខាងស្រីក៏បានរំសាយមង្គលការនេះចោល។
នាងឱ្យមូលហេតុថា ខាងប្រុសស្មោះត្រង់ពេក និង មានចំណូលតិចពេក ហើយនាងក៏បានសុខចិត្តឱ្យថ្លៃទឹកដោះទៅវិញដែរ តែនាងសុំកាត់ប្រមាណ ៤ ពាន់ដុល្លារ ជាថ្លៃដែលគេឱបនាងនៅថ្ងៃថត Pre-Wedding និង ថ្លៃចាយវាយកាលដែលនៅជាសង្សារនឹងគ្នា។ យ៉ាងណាមិញ មហាជនពិតជាហួសចិត្តខ្លាំងណាស់ ក្រោយពីបានដឹងរឿងរ៉ាវនេះ ជាពិសេសម្នាក់ៗនាំគ្នារិះគន់ថាខាងស្រីពិតជាចង់កេងចំណេញខាងប្រុសហួសពេកតែម្តង៕
