នាពេលថ្មីៗនេះ អ្នកឧកញ៉ា គិត ម៉េង អ្នកជំនួញដ៏មានសក្ដានុពល ជោគជ័យទាំងជំនួញ និង ជោគជ័យទាំងជីវិតគ្រួសារដ៏មានសុភង្គល បានចែករំលែកនូវទម្លាប់តូចៗចំនួន ៦ ដែលនាំឱ្យជីវិតកាន់តែមានសុភមង្គល ព្រមទាំងបានណែនាំឱ្យចាប់ផ្តើមទម្លាប់តូចៗពីពេលនេះទៅ។
ទម្លាប់តូចៗចំនួន ៦ ដែលនាំឱ្យជីវិតកាន់តែមានសុភមង្គល មានដូចជា ៖
១. ប្រកាន់ខ្ជាប់នូវគោលគំនិតក្នុង «ការធ្វើឱ្យទម្លាប់របស់អ្នកប្រសើរទ្បើងត្រឹម១ភាគរយ»
សូមជ្រើសរើសយកទម្លាប់មួយដែលអ្នកយល់ថាមិនល្អ ដូចជាកំណត់បរិមាណទឹកដែលត្រូវផឹក ឬ កាត់បន្ថយរយៈពេលនៃការសម្លឹងអេក្រង់ឧបករណ៍បច្ចេកវិទ្យា ហើយផ្តោតលើការធ្វើឱ្យទម្លាប់ទាំងនេះប្រសើរទ្បើងត្រឹម ១ ភាគរយជារៀងរាល់ថ្ងៃ។ សកម្មភាពតូចៗបែបនេះដែលអ្នកធ្វើជាប្រចាំ នឹងបង្កើតទម្លាប់ល្អដល់អ្នក ហើយទម្លាប់ទាំងនោះនឹងធ្វើឱ្យអ្នកមានភាពរីកចម្រើន។
២. ប្រកាន់យកទម្លាប់ «ដកដង្ហើមចូលវែងៗឱ្យបាន ៣ ដង»
មុនពេលអ្នកចាប់ផ្តើមបំពេញការងាររបស់អ្នក ឬ មុនពេលចូលរួមកិច្ចប្រជុំ សូមដកដង្ហើមចូលវែងៗឱ្យបាន ៣ ដង។ សូមជឿខ្ញុំ ការធ្វើបែបនេះជួយឱ្យខួរក្បាលរបស់អ្នកមានសុខភាពល្អ និង ផ្តល់ឱ្យអ្នកនូវថាមពលបន្ថែមទៀត។
៣. អបអរភាពជោគជ័យតូចៗ
អបអរសកម្មភាពតូចៗដែលអ្នកសម្រេចបាន ទោះបីវាគ្រាន់តែជាកិច្ចការ ឬ ការងារដែលអ្នកចង់បំពេញក៏ដោយ។ នៅពេលដែលអ្នកព្យាយាមកត់សម្គាល់ចំណុចទាំងនេះ អ្នកនឹងមានភាពភ្ញាក់ផ្អើលថាសមិទ្ធផលតូចៗគឺជាជោគជ័យដែលជំរុញចិត្តរបស់អ្នក។
៤. ចំណាយពេល ១០ នាទី ដើម្បីខ្លួនអ្នក
សូមក្រោកពីដំណេកមុនទម្លាប់ឱ្យបាន ១០ នាទី ប៉ុន្តែមិនមែនដើម្បីការងាររបស់អ្នកទេ គឺដើម្បីផ្តោតលើសុខុមាលភាពខ្លួនអ្នក ដោយការពត់ខ្លួន ផឹកទឹក ឬ គ្រាន់តែអង្គុយ និង ដកដង្ហើមមួយៗ។ សកម្មភាពទាំងនេះធ្វើឱ្យអារម្មណ៍អ្នកជ្រះថ្លា ហើយធ្វើឱ្យអ្នកផ្តោតលើកិច្ចការទូទៅបានល្អពេញមួយថ្ងៃ។
៥. បំបែកគោលដៅធំៗឱ្យទៅជាផ្នែកតូចៗដែលអាចគ្រប់គ្រងបាន ដើម្បីកុំឱ្យអ្នកមានអារម្មណ៍ថាគោលដៅរបស់អ្នកមានភាពលើសលប់
តើអ្នកចង់ហាត់ប្រាណ ៣០ នាទីឬ? អ្នកគួរចាប់ផ្តើមហាត់រយៈពេល ១៥ នាទីសិន។ បើអ្នកចង់អានសៀវភៅមួយក្បាលឱ្យចប់ អ្នកគួរអាន ១ ទំព័រសិន។ ភាពរីកចម្រើន ទោះតិចយ៉ាងណា ក៏នៅតែបន្តរីកចម្រើនទៅមុខ។
៦. ជំនួសជាជាងបញ្ឈប់
តើអ្នកព្យាយាមបោះបង់ទម្លាប់អាក្រក់ចោលឬ? សូមជំនួសទម្លាប់អាក្រក់នោះដោយទម្លាប់ល្អ។ ជំនួសការសម្លឹងមើលទូរសព្ទមុនពេលចូលគេង ដោយការអានសៀវភៅ។ ជំនួសការហូបអាហារកែច្នៃ ដោយការបរិភោគផ្លែឈើ។ សកម្មភាពបែបនេះផ្តល់ភាពកាន់តែងាយស្រួលដល់អ្នកក្នុងការបង្កើតទម្លាប់ល្អ នៅពេលអ្នកផ្តោតការផ្លាស់ប្តូរទម្លាប់របស់អ្នក ដោយការជំនួសជាជាងការបញ្ឈប់៕
ប្រភព ៖ Neak Oknha Kith Meng
