ទម្លាយអាថ៌កំបាំង «ខ្មោចអាវក្រហម» ដើរលងគេឯងពេញគុក ហើយខ្សឹបបបួលឱ្យចង-..ក គួរឱ្យខ្លាច
ពន្ធនាគារ គឺជាសំណង់អគារមន្ទីរឃុំឃាំងសម្រាប់រក្សាជនមានពិរុទ្ធ និង អ្នកសាងអំពើមិនល្អដែលនីតិសង្គមបានកំណត់ថាជាបទល្មើសដើម្បីមកទទួលទោស កំណត់ឱ្យខ្លីហៅថា «គុក»។ ជាប់ក្នុងគុក វាគឺជាទារុណកម្មដែលពេញដោយសម្ពាធ មហាវេទនាទាំងរាងកាយ និង ចិត្តរួចស្រាប់ទៅហើយ ជីវិតប្រចាំថ្ងៃនៅក្នុងគុកគឺមិនរីករាយទេ ហើយបើគុកនោះមានខ្មោចតៃហោងលងទៀត គុកនឹងក្លាយទៅជាស្ថាននរកដែលរស់ពិបាកជាងស្លាប់ជាក់ជាមិនខាន។
គ្រឹស្តសករាជ ២០១៤ មានករណីភ្ញាក់ផ្អើលដ៏ខ្លាំងមួយ បានកើតមានឡើងនៅប្រទេសថៃ ក្រោយមន្ត្រីនាយកដ្ឋានបង្រ្កាបបទល្មើសជាច្រើនបានប្រកាសតាមសារព័ត៌មាន បាងកកញូស៍ថា មានវត្តមានវិញ្ញាណខ្មោចលងក្នុងពន្ធនាគារ។ អ្នកទោស និង មន្ត្រីជាច្រើនដែលបានឃើញវានៅក្នុងអគារ សន្មតហៅវិញ្ញាណអមនុស្សនោះថា «បុរសអាវក្រហម» ។
ប្រវត្តិ «បុរសអាវក្រហម»
កាលដើមឡើយ មុនរឿងផ្ទុះឡើង វិញ្ញាណដែលគ្រប់គ្នាស្គាល់នោះ គឺមានឈ្មោះថា ឆាឡាត់ សេណារ៉ាត់ ត្រូវបានឃាត់ខ្លួនពីបទរំលោភសេពសន្ថវៈ ហើយក្រោយសម្រេចសាលក្រមជាប់ពន្ធនាគារ ឆាឡាត់ បានបញ្ចប់ជីវិតដោយការធ្វើអត្តឃាតនៅក្នុងបន្ទប់របស់គាត់ដោយចងកនឹងខ្សែកំណាត់ ជាមួយនឹងខោអាវដែលគាត់ពាក់គឺមានពណ៌ក្រហម។
តាមជំនឿខ្មោចដែលស្លាប់ក្នុងឈុតពណ៌ក្រហម ទោះជាអត្តឃាត ឬ ត្រូវគេធ្វើឃាត គឺនឹងក្លាយជាវិញ្ញាណដែលកាចសាហាវក្រៃលែង។ តាំងពីពេលដែលអ្នកទោសឈុតក្រហមនោះចងកមក អ្នកទោសដែលជាប់គុកក្នុងបន្ទប់តែមួយ ឬ អ្នកជាប់ឃុំនៅក្បែរនោះ តែងតែប្រាប់រឿងរ៉ាវដ៏ព្រឺព្រួច នៃការភ្ញាក់ពីដំណេកទាំងកណ្តាលយប់ដោយឃើញ «បុរសអាវក្រហម» ឱនមើលមុខពួកគេដោយភ្នែកធំៗ ជាមួយនឹងការហុចខ្សែមួយ ដោយវាចារឡើងខ្សាវៗថា ៖ «ម៉ោះ!! ចង-កហ្អី?»។
ព្រឹត្តិការណ៍វិញ្ញាណខ្មោចប្រាប់ឱ្យសម្លាប់ខ្លួនដោយការចង-កនេះ បានបន្តរហូតដល់ឆ្នាំ ២០១៧ គ្រប់អ្នកទោសចាស់ថ្មីដែលត្រូវខ្មោចលងសុទ្ធតែអះអាងរៀបរាប់ភិនភាគស្រដៀងគ្នាថា ពួកគេបានឃើញមនុស្សស្លៀកពាក់ក្រហមហុចខ្សែបង្គាប់ឱ្យពួកគេទៅចង-ក ដោយណែនាំថា វាគឺជាវិធីតែមួយគត់ដើម្បីគេចចេញពីការកាត់ទោសរបស់ពួកគេ។ មានគ្រូបង្រៀនម្នាក់ឈ្មោះ សក្តិឆៃ បានប្រាប់សារព័ត៌មានថា ក្រោយគាត់រំលោភសិស្សរបស់ខ្លួនឯងហើយជាប់ឃុំនៅទីនេះ ក៏ជួបហេតុការណ៍មនុស្សឈុតក្រហមប្រាប់ឱ្យគាត់ចង-កដែរ ហើយក្រោយពេលទទួលទោសដល់ពេលចេញពីពន្ធនាគារ មន្ត្រីប៉ូលិសបាននិយាយថា សក្តិឆៃ ចេញពីគុកទាំងញញឹមរួចទៅចង-កនៅផ្ទះរបស់ខ្លួន។
ថ្ងៃទី ១ ខែកញ្ញា ឆ្នាំ ២០១៥ ព័ត៌មានខ្មោចលងក្នុងគុកពាក់អាវយឹតក្រហមល្បីពេញប្រទេស ហើយមានមហាព្រឹត្តិការណ៍និមន្តព្រះសង្ឃទៅប្រោះព្រំបរិវេណគុកទាំងអស់ និង ស្រោចទឹកជូនអ្នកទោសក្នុងពន្ធនាគារនោះ ហើយកាន់តែគួរឱ្យព្រឺសម្បុរទៀតនោះ ពិធីករសារព័ត៌មាន Modern Nine TV ស្រែកថាបានឃើញបុរសអាវយឺតក្រហម ស្លៀកខោកៅស៊ូខ្មៅនៅក្រាបក្នុងគុក ដែលលោកតានិមន្តប្រោះទឹកមន្ត។
គ្រប់គ្នារង់ចាំមើលតើក្រោយធ្វើពិធីសាសនាហើយ តើអាចដោះស្រាយបញ្ហាខ្មោចលងក្នុងគុកនេះបានឬយ៉ាងណា? តែខុសការរំពឹងទុក គ្រប់យ៉ាងនៅតែមិនអាចស្តារបាន ឆ្នាំដដែលនោះដែរ ក្រោយការប្រោះព្រំប្រសិទ្ធីទីកន្លែងខ្មោចលងរួចរាល់ ចំនួនអ្នកទោសជាច្រើនបានចង-ក ដង្ហែគ្នា និង បន្តចង-កខ្លួនឯងឥតដាច់ រហូតដល់គ្រឹស្តសករាជ ២០១៧ មានការរុះរើ វាយកំទេចគុកសង់ថ្មី លាបពណ៌ថ្មី ឡើងវិញ រីឯសម្ភារចាស់ៗ មិនថាតុទូកៅអី គ្រែដេក សូម្បីតែសម្លៀកបំពាក់ កំណាត់ជូតជើង ខ្សែលួស របស់ប្រើប្រាស់ ជាពិសេសអ្វីដែលមានពណ៌ក្រហម គឺត្រូវបានដុតចោលទាំងអស់ ហាមផ្តាច់មិនឱ្យមានការប្រើវិញនោះឡើយ ហើយរឿងបុរសឈុតក្រហមនោះ ក៏ហាក់សាបរលាបទល់សព្វថ្ងៃ៕
ប្រភព៖ INTERNET
