នៅថ្ងៃទី ១៩ ខែមករា ឆ្នាំ ២០២៥ តាមរយៈផេក វេជ្ជ. ហ៊ាង រតនា បានបង្ហោះសារណែនាំឱ្យបងប្អូននាំគ្នាប្រុងប្រយ័ត្នទៅលើចំណីអាហារ ដែលរយៈពេលជាង ១០ ថ្ងៃចុងក្រោយនេះ លោកបានកត់សម្គាល់ឃើញថា មានអ្នកជំងឺពុលចំណីច្រើនមែនទែន ហើយធ្វើទុក្ខខ្លាំងលើកូនក្មេង ដែលសញ្ញាដំបូងគេគឺក្អួត បន្ទាប់មកចុកពោះ និង ក្តៅខ្លួនខ្លាំងនៅចន្លោះ ៦ ទៅ ១២ ម៉ោងក្រោយក្អួត។
ក្នុងនោះ លោកវេជ្ជបណ្ឌិតបានបញ្ជាក់ឱ្យដឹងថា អាហារដែលសង្ស័យខ្ពស់ជាងគេ គឺប្រហិត ជ្រក់ ប៉ាតេ អាហារផ្អាប់ និង អាហារសល់យូរ។
បន្ថែមលើសពីនេះ លោកវេជ្ជបណ្ឌិតបានឱ្យដឹងទៀតថា ៖ «ខ្ញុំមិនទាន់ដឹងថាវាបង្កដោយមេរោគអ្វីនោះទេ តែសង្ស័យខ្ពស់គឺបាក់តេរី តែមិនដឹងបាក់តេរីប្រភេទអ្វី (ទាល់តែបណ្តុះមេរោគលើថ្នាលដោយលាមក ឬ ឈាម Culture ដែលលទ្ធផលអាច ៥ ទៅ ៧ ថ្ងៃទើបបាន)»៕
