តាមរយៈការចុះផ្សាយរបស់សារព័ត៌មានម៉ាឡេស៊ី The Star នៅថ្ងៃទី ០៥ ខែសីហា ឆ្នាំ ២០២៥ បានឱ្យដឹងថា លោក Anwar Ibrahim នាយករដ្ឋមន្ត្រីម៉ាឡេស៊ី និង ជាប្រធានអាស៊ាន បានមានប្រសាសន៍ថា ម៉ាឡេស៊ី បានត្រៀមលក្ខណៈរួចជាស្រេច ដើម្បីបញ្ជូនក្រុមអ្នកតាមដានទៅកាន់ព្រំដែនកម្ពុជា និង ថៃ ប្រសិនបើមានការស្នើសុំពីប្រទេសទាំង ២។
យ៉ាងណាមិញ នាយករដ្ឋមន្ត្រីម៉ាឡេស៊ី លោក Anwar បានបញ្ជាក់ថា ការសម្រេចចិត្តពាក់ព័ន្ធនឹងវត្តមានយោធាសម្រាប់ការតាមដាន អាចនឹងត្រូវបានសម្រេចនៅពេលក្រោយ ខណៈស្ថានការណ៍ នៅតំបន់ព្រំដែនរវាងប្រទេសទាំង ២ កំពុងស្ថិតនៅក្រោមការគ្រប់គ្រង។ «មិនថាជាវត្តមានយោធាដែលជាតម្រូវការ សម្រាប់ការតាមដាននឹងត្រូវបានសម្រេចនៅពេលក្រោយ។ ពីព្រោះ បច្ចុប្បន្នស្ថានការណ៍នៅតែបន្តស្ថិតក្រោមការគ្រប់គ្រង បើទោះជាមានភាពតានតឹងនៅឡើយក៏ដោយ»។ នេះជាការគូសបញ្ជាក់របស់លោក Anwar ដោយបន្ថែមថា ម៉ាឡេស៊ីកំពុងតាមដានការអនុវត្តបទឈប់បាញ់ដោយប្រើផ្កាយរណប។
គួរឱ្យដឹងផងដែរថា តាមរយៈលោក Anwar Ibrahim មកទល់នឹងពេលនេះ កម្ពុជា និងថៃ បានស្នើឱ្យម៉ាឡេស៊ី ជួយសម្របសម្រួលកិច្ចចរចារវាងក្រុមមន្ត្រីជាន់ខ្ពស់ នៃក្រសួងការពារជាតិរបស់ប្រទេសទាំង ២ ក្នុងទីក្រុងគូឡាឡាំពួ នៅថ្ងៃទី ៧ ខែសីហា ឆ្នាំ ២០២៥ នេះ៕
ប្រភព ៖ Fresh News
