សារព័ត៌មាន Sinchew បានរាយការណ៍ពីករណីរបស់លោកតាវ័យ ៨០ ឆ្នាំនៅចិន ដែលត្រូវសង្រ្គោះបន្ទាន់ ដោយសារតែឈឺធ្មេញពេក ទៅរកពេទ្យ ហើយពេទ្យដកធ្មេញអស់ ៩ គ្រាប់។
តាមព័ត៌មានបានឱ្យដឹងថា លោកតារូបនេះតែងមានអាការឈឺធ្មេញជាប្រចាំ ដែលបង្កឱ្យមានការពិបាកក្នុងការទទួលទានអាហារជាខ្លាំង។ ថ្ងៃមួយ លោកតាបានចាប់អារម្មណ៍លើគ្លីនិកធ្មេញមួយ ដែលបានផ្សាយពាណិជ្ជកម្មនៅក្នុងទូរស័ព្ទថា មានសេវាដាក់ធ្មេញរហ័ស ងាយស្រួល ដោយដាក់ធ្មេញពេលព្រឹក នោះល្ងាចឡើងអាចទទួលអាហារបានជាធម្មតា។
លោកតាបានទៅគ្លីនិកធ្មេញនោះ ដោយដំបូងឡើយគិតថាគ្រាន់តែទៅសួរព័ត៌មានធម្មតា តែគ្លីនិកបានឱ្យលោកតាធ្វើការវថតធ្មេញមើល ហើយប្រាប់លោកតាថាធ្មេញពុកអស់ហើយ ណែនាំឱ្យដកនៅក្នុងថ្ងៃនេះតែម្តង កុំឱ្យពិបាកមកលើកក្រោយទៀត។ លោកតាបានយល់ព្រម ហើយខាងគ្លីនិកបានដកធ្មេញលោកតាអស់រហូតដល់ទៅ ៩ គ្រាប់ឯណោះ ហើយលោកតាក៏បានសន្លប់បាត់ស្មារតីខណៈកំពុងដកនោះ ចុងក្រោយក៏ត្រូវបានគេបញ្ជូនទៅសង្រ្គោះបន្ទាន់។
ខាងគ្រូពេទ្យបានឱ្យដឹងថា លោកតាមានការរលាកសួត ដោយសារតែឈ្លក់ឈាមចូល លើសពីនេះមានការបាត់ដង្ហើម រឹងសរសៃឈាម និង បេះដូងលោតញាប់ខ្លាំង ហើយបើសិនជាបញ្ជូនមកយឺតតែ ២ នាទីនោះ លោកតាប្រាកដជាបាត់បង់ជីវិតហើយ៕
ប្រភព៖ Kapook
