នៅថ្ងៃទី ០១ ខែមីនា ឆ្នាំ ២០២៥ កន្លងទៅ មានករណីសម្លាប់ក្មេងស្រីម្នាក់ និង យកទៅកប់ដីទាំងអាក្រាតកាយ ស្ថិតនៅចំណុចក្បែរផ្សារទំនើប Aeon3 ស្ថិតក្នុងសង្កាត់ជើងឯក ខណ្ឌដង្កោ រាជធានីភ្នំពេញ បង្កជាការភ្ញាក់ផ្អើល។
ទាក់ទិនទៅនឹងករណីនេះ បើតាមប្រភពព័ត៌មានបានឱ្យដឹងថា បច្ចុប្បន្នសមត្ថកិច្ចឃាត់ខ្លួនបានជនសង្ស័យដែលជាជនជាតិចិនចំនួន ២ នាក់ និង ម្នាក់ទៀត កំពុងគេចខ្លួន ខណៈជនសង្ស័យដែលឃាត់ខ្លួនរួមមាន ៖
១. ឈ្មោះ CHEN CONG ភេទប្រុស អាយុ ៣០ ឆ្នាំ ជនជាតិចិន លិខិតឆ្លងដែនលេខ EM2676148 ឃាត់ខ្លួនត្រង់ចំណុច អាគារព្រីនស៍ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ត្រូវជាសង្សារនារីរងគ្រោះ
២. ឈ្មោះ LI HAOHAO ភេទប្រុស ជនជាតិចិន អាយុ ៣៤ ឆ្នាំ លិខិតឆ្លងដែនលេខ EB2013601 ត្រង់ចំនុចស្ពានអាកាស សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
តាមប្រភពបានឱ្យដឹងទៀតថា ជនសង្ស័យទាំង ២ បានសារភាពថា ពួកគេពិតជាបានចូលរួមក្នុងសកម្មភាពសម្លាប់នារីរងគ្រោះ កាលពីយប់ថ្ងៃទី ២៧ ខែកុម្ភៈ ឆ្នាំ ២០២៥ កន្លងទៅ ដោយមាន ឈ្មោះ YANG KAIXIN ភេទប្រុស អាយុ ២៦ ឆ្នាំ ជាជនជាតិចិន លិខិតឆ្លងដែន EL4710161 កំពុងរត់គេចខ្លួន ជាអ្នករៀបចំគម្រោងសម្លាប់នេះ ដោយមូលហេតុនារីរងគ្រោះ បានដឹងរឿងសម្ងាត់របស់ពួកគេ៕
