បច្ចុប្បន្ន ក្រុមហ៊ុន CheckinMe ដែលជាបច្ចេកវិទ្យាគ្រប់គ្រងធនធានមនុស្សឈានមុខគេនៅកម្ពុជា បានកំពុងទទួលបានការចាប់អារម្មណ៍ខ្លាំង ដែលផ្ដោតសំខាន់លើការជំរុញប្រសិទ្ធភាពការងារ និង ភាពងាយស្រួលដល់ម្ចាស់អាជីវកម្ម និង ស្ថាប័នគ្រប់ជាន់ថ្នាក់ ជាមួយប្រព័ន្ធសំខាន់ៗទាំង ៣ រួមមាន៖ ប្រព័ន្ធគ្រប់គ្រងវត្តមានបុគ្គលិក Attendance System, ប្រព័ន្ធគ្រប់គ្រងប្រាក់ខែបុគ្គលិក Payroll System, និង ប្រព័ន្ធគ្រប់គ្រងការលក់ CRM System។
ក្រុមហ៊ុនបង្កើតបច្ចេកវិទ្យាថ្មីនៃការស្រង់វត្តមានតាម QR កូដដំបូងគេបង្អស់នៅកម្ពុជានេះ ត្រូវបានបង្កើតឡើងដោយ ស្ថាបនិក លោក ឡី កំថូង ជានាយកប្រតិបត្តិនៃក្រុមហ៊ុន CheckinMe Cambodia។ ជាអ្នកដឹកនាំមួយរូប លោកតែងមានភាពច្នៃប្រឌិតខ្ពស់ និង គិតពីផលប្រយោជន៍សម្រាប់សង្គមជាតិ។ គោលដៅធំបំផុតរបស់លោក គឺចូលរួមអភិវឌ្ឍន៍បច្ចេកវិទ្យានៅកម្ពុជាឱ្យមានភាពរីកចម្រើន ជួយលើកកម្ពស់ម្ចាស់អាជីវកម្មឈានចូលទៅរកស្ដង់ដារអន្ដរជាតិ។
ប្រលូកច្រើនឆ្នាំក្នុងវិស័យបច្ចេកវិទ្យា ស្ថាបនិករូបនេះ ក៏ធ្លាប់បានចូលរួមប្រកួត និង ឈ្នះពានរង្វាន់ពីកម្មវិធីជាតិ និង អន្តជាតិជាច្រើនផងដែរ។ ក្នុងនោះរួមមាន៖ ជ័យលាភីលំដាប់រងទី ១ ឬលេខ ២ នៅតំបន់អាស៊ីអាគ្នេយ៍ក្នុងកម្មវិធី Alibaba Cloud Global Contest របស់ក្រុមហ៊ុនបច្ចេកវិទ្យាធំបំផុតនៅលើពិភពលោក, ពានរង្វាន់ការចាប់ផ្តើមអាជីវកម្មឌីជីថលល្អបំផុតពី Cambodia Digital Awards 2022, ចំណាត់ថ្នាក់ទី ៣ ពីកម្មវិធីប្រកួតពានរង្វាន់ សហគ្រិនខ្មែរ សហគ្រាសធុនតូច និង មធ្យម KE SME Awards 2022, និង ឈ្នះពានរង្វាន់សហគ្រិនឆ្នើមវ័យក្មេងក្នុងកម្មវិធី Cambodian Young Entrepreneur Award 2022។
ជាមួយនឹងការធ្វើអាជីវកម្ម កាលពីចុងខែឧសភានេះ លោកបានទទួលពានរង្វាន់ 𝐕𝐢𝐬𝐢𝐨𝐧𝐚𝐫𝐲 𝐚𝐧𝐝 𝐈𝐧𝐧𝐨𝐯𝐚𝐭𝐢𝐨𝐧 𝐂𝐄𝐎 𝐄𝐱𝐜𝐞𝐥𝐥𝐞𝐧𝐜𝐞 𝐨𝐟 𝐭𝐡𝐞 𝐘𝐞𝐚𝐫 𝟐𝟎𝟐𝟓 ពីស្ថាប័ន Asia Prestige CEO Excellence Award។ ព្រឹត្តិការណ៍នេះ ជាការទទួលស្គាល់អ្នកដឹកនាំ ដែលមានចក្ខុវិស័យ ភាពច្នៃប្រឌិត អ្នកគ្រប់គ្រងកំពូល សហគ្រិន និង ម្ចាស់អាជីវកម្មនៅក្នុងឧស្សាហកម្មផ្សេងៗ ដែលបានរួមចំណែកចំពោះសេដ្ឋកិច្ចសង្គមនៅក្នុងតំបន់អាស៊ី។
មិនតែប៉ុណ្ណោះ ថ្មីៗនេះ លោកត្រូវបានជ្រើសរើសចូលរួមកម្មវិធី Plug an Play Silicon Valley Summit 2025 នៅសហរដ្ឋអាមេរិក តាមរយៈក្រសួងប្រៃសណីយ៍ និង ទូរគមនាគមន៍ (Ministry of Post and Telecommunications) ដែលនឹងធ្វើឡើងនៅថ្ងៃទី ១០-១២ ខែ មិថុនា ឆ្នាំ ២០២៥។ សមិទ្ធិផលនេះ គឺជាព្រឹត្តិការណ៍ដ៏មានមោទកភាពមួយទៀតសម្រាប់ប្រព័ន្ធអេកូឡូស៊ីនវានុវត្តន៍របស់កម្ពុជា៕
