នៅព្រឹកថ្ងៃទី ២៨ ខែកក្កដា ឆ្នាំ ២០២៥ នេះ ឯកឧត្តម ហ៊ាង រតនា អគ្គនាយក CMAC នៅកម្ពុជា បានបញ្ជាក់ឱ្យដឹងថា ប្រាសាទព្រះវិហារ ត្រូវបានទាហានឈ្លានពានសៀមប្រើប្រាស់ការទម្លាក់គ្រាប់បែក MK-82 (ទម្ងន់ប្រមាណ ២៣០ គ.ក) ជាច្រើនគ្រាប់ រួមនឹងគ្រាប់ផ្លោងគ្រប់ប្រភេទ ជាពិសេសគ្រាប់ផ្លោង ១៥៥ មម ជាមួយគ្រាប់បែកចង្កោម ក្នុងគោលដៅកម្ទេចប្រាសាទព្រះវិហារជាបេតិកភណ្ឌពិភពលោកមួយនេះ ដែលក្នុងស្មារតីការពារបូរណភាពទឹកដី និង ប្រាសាទព្រះវិហារកេរមរតកដូនតាខ្មែរ កងកម្លាំងប្រដាប់អាវុធដ៏អង់អាចក្លាហានរបស់កម្ពុជា បានវាយបកប្រយុទ្ធតតាំងជាមួយខ្មាំងឈ្លានពានប្រកបដោយជោគជ័យ។
ឯកឧត្តមបានបន្តថា រយៈពេលជាង ៥០ ឆ្នាំមកហើយ ពោលគឺចាប់ខែឧសភា ឆ្នាំ ១៩៧៥ ដែលគ្រាប់បែក MK-82 បានបាត់សំឡេងផ្ទុះទឹកដីនៃមាតុភូមិនេះ ខណៈក្នុងអតីតសង្គ្រាមនោះ គ្រាប់បែក MK-82 ចំនួន ៩១៩ ៦២២ គ្រាប់ ត្រូវបានទម្លាក់លើ ៥៥ ៦១៤ ទីតាំង ដោយមានយន្តហោះទម្លាក់ចំនួន ១១៥ ៨៨៦ ជើងហោះហើរទម្លាក់គ្រាប់បែកលើទឹកដីកម្ពុជា ប៉ុន្តែក្នុងពេលសង្គ្រាមនោះ គ្មានគ្រាប់បែក MK-82 ត្រូវបានទម្លាក់នៅប្រាសាទព្រះវិហារនោះទេ។
លោកបានបន្តថា ប្រាសាទព្រះវិហារ ជាទីតាំងដ៏ស័ក្តិសិទ្ធបំផុត សូម្បីតែអតីតព្រះមហាក្សត្រសៀមឡើងសោយរាជ្យក៏យកទឹកមន្តពីប្រាសាទព្រះវិហារដើម្បីប្រោះព្រំឫទ្ធីអំណាចផងដែរ ដូចនេះរដ្ឋណា ឬ អ្នកណាបំផ្លាញប្រាសាទព្រះវិហារ នឹងទទួលនូវផលកម្មវិនាសហិនហោចវិញមិនខានឡើយ៕
