នៅព្រឹកថ្ងៃទី ២ ខែសីហា ឆ្នាំ ២០២៥ នេះ អ្នកនាំពាក្យរាជរដ្ឋាភិបាល បានធ្វើសេចក្តីសង្ខេបព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅទីស្តីការគណៈរដ្ឋមន្ត្រី។
តាមរយៈសេចក្ដីសង្ខេបព័ត៌មាន អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា បានឱ្យដឹងថា កម្ពុជានៅតែបន្តការអំពាវនាវឱ្យភាគីថៃ ធ្វើការបញ្ជូនត្រឡប់មកវិញនូវកងកម្លាំងកម្ពុជាចំនួន ១៨ រូប ដែលស្ថិតនៅក្រោមការគ្រប់គ្រងរបស់ភាគីថៃ ឱ្យបានឆាប់រហ័ស និង មានសុវត្ថិភាព។
អ្នកនាំពាក្យបានបន្តទៀតថា ថ្នាក់ដឹកនាំនៃរាជរដ្ឋាភិបាលកម្ពុជាគ្រប់ជាន់ថ្នាក់ទាំងអស់ នៅតែបន្តការយកចិត្តទុកដាក់ ចរចាធ្វើយ៉ាងណាឱ្យភាគីថៃបញ្ជូនត្រឡប់មកវិញនូវបងប្អូនរបស់យើងឱ្យបានឆាប់រហ័ស និង មានសុវត្ដិភាពចំពោះពួកគាត់៕
