នៅថ្ងៃទី ១២ ខែកុម្ភៈ ឆ្នាំ ២០២៥ នេះ តាមរយៈគណនីហ្វេសប៊ុកដែលមានឈ្មោះ Leng C. Virak បានជូនដំណឹងឱ្យបានដឹងថា លោកគ្រូ ជ័យ ចាប រហ័សនាម ចាបពូក កំពូលអ្នកតែងនិពន្ធកំណាព្យដ៏ល្បីល្បាញ លោកមានជំងឺយ៉ាងធ្ងន់ កំពុងសម្រាកព្យាបាលសង្គ្រោះបន្ទាន់នៅប្រទេសវៀតណាម។
តាមប្រភពបានឱ្យដឹងទៀតថា នេះជាការជូនដំណឹងដល់អតីតនិស្សិតនៃសាកលវិទ្យាល័យភូមិន្ទភ្នំពេញ ក៏ដូចជាសមាជិកសមាគមអ្នកតែងនិពន្ធខ្មែរ ដើម្បីនាំគ្នារួមចំណែកចែករំលែកទទួលបន្ទុកជាមួយគ្រួសារលោកគ្រូ ក្នុងការព្យាបាលឱ្យលោកគ្រូឆាប់ជាសះស្បើយឡើងវិញ។
គួរឱ្យដឹងដែរថា លោកគ្រូ ជ័យ ចាប ឬ ឯកឧត្តម ជ័យ ចាប លោកគឺជាទីប្រឹក្សារាជរដ្ឋាភិបាល នៃព្រះរាជាណាចក្រកម្ពុជា ទីប្រឹក្សាសម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រី ព្រះបរមរាជវាំង ជាសាស្រ្តាចារ្យផ្នែករចនាបទវិទ្យា នៅសាកលវិទ្យាល័យភូមិន្ទភ្នំពេញ និង ជាកវីកំណាព្យជើងចាស់ដ៏មានទេពកោសល្យ និង ភាពល្បីល្បាញមួយរូបដែលត្រូវបានសិស្ស និស្សិតគោរពស្រឡាញ់ណាស់៕
