នៅព្រឹកថ្ងៃទី ២៤ ខែមិថុនា ឆ្នាំ ២០២៥ នេះ កម្លាំងជំនាញ បានរកឃើញសពស្ត្រីម្នាក់ បានបាត់ខ្លួនដោយសារជំនន់ទឹកភ្លៀងដាច់ផ្លូវ នៅរមណីដ្ឋានក្បាលឆាយ ក្រុងព្រះសីហនុ ហើយ។ នេះបើតាមការឱ្យដឹងពីគណនី Sorm Pheaktra News នៅព្រឹកថ្ងៃទី ២៤ ខែមិថុនា ឆ្នាំ ២០២៥ នេះ។
តាមប្រភពព័ត៌មានបានឱ្យដឹងថា សពបានរកឃើញនៅតាមទឹកហូរពីត្បូងទៅជើងចម្ងាយប្រហែល ៣០០ ម៉ែត្រ ពីកន្លែងបាក់ផ្លូវ រកឃើញសពស្រ្តីនោះនៅវេលាម៉ោង ៨.៤០ នាទីព្រឹក ចម្ងាយពីម៉ូតូ ៤១ ម៉ែត្រមកសាកសព។ ស្ថានភាពសព ក្បាលទៅទិសខាងកើត ជេីងបែរទៅលិច សពដេកផ្អៀង សពកប់ដីគាបជាប់នឹងគល់ឈើចំណុច 48P U S 46165.77709 ។
គួរឱ្យដឹងថា កាលពីម៉ោង ៤ ទាបភ្លឺ ថ្ងៃទី ២២ ខែមិថុនា ឆ្នាំ ២០២៥ មានហេតុការណ៍បាក់ដាច់ផ្លូវចូលទៅរមណីយដ្ឋាន បណ្ដាលឱ្យស្រ្តីម្នាក់ដែលកំពុងជិះម៉ូតូ បានបាត់ខ្លួនតាមទឹកហូរ បន្ទាប់ពីការបាក់ផ្លូវនេះ។ ស្ត្រីដែលបានបាត់ខ្លួន មានឈ្មោះ ទ្រី ផល្លី ជិះម៉ូតូម៉ាក SUZUKI SMASH គ្មានផ្លាកលេខ ធ្វើការជាចុងភៅនៅភោជនីយដ្ឋានមួយកន្លែង នៅអូរ៣ សង្កាត់៤ ក្រុងព្រះសីហនុ ដែលក្នុងហេតុការណ៍នេះ សមត្ថកិច្ច និង ក្រុមគ្រួសារសន្និដ្ឋានថា គ្រោះថ្នាក់នេះទំនងជាកើតឡើងពេលស្ត្រីរងគ្រោះចេញពីធ្វើការត្រឡប់មកផ្ទះវិញ បើកម៉ូតូឆ្លងកាត់ចំពេលបាក់ផ្លូវ។ បច្ចុប្បន្នកម្លាំងជំនាញ បានរកឃើញស្រ្តីដែលបាត់ខ្លួនតាមទឹកហូរហើយ ក្នុងសភាពជាសព នៅព្រឹកថ្ងៃទី ២៤ ខែមិថុនា ឆ្នាំ ២០២៥ នេះ៕
