នៅព្រឹកថ្ងៃទី ១៤ ខែកក្កដា ឆ្នាំ ២០២៥ នេះ មជ្ឈមណ្ឌលសកម្មភាពកម្ចាត់មីនកម្ពុជា បានជូនដំណឹងពីករណីផ្ទុះមីនតោនកំឡុងពេលភ្ជួរដីចម្ការ ដែលបណ្តាលឱ្យបុរសម្នាក់ដែលជាម្ចាស់ចម្ការ បានបាត់បង់ជីវិត នៅខេត្តបាត់ដំបង។
ទាក់ទិនទៅនឹងករណីនេះ ខាង CMAC បានបញ្ជាក់ឱ្យបានដឹងថា នៅល្ងាចថ្ងៃទី ១៣ ខែកក្កដា ឆ្នាំ ២០២៥ មានករណីផ្ទុះគ្រាប់មីនតោនសំណល់សង្គ្រាម បណ្តាលឱ្យអ្នកបើកបរត្រាក់ទ័រម្នាក់ឈ្មោះ ផុន សុភី ដាច់ជើងម្ខាង និង ខូចខាតត្រាក់ទ័រភ្ជួរដីទាំងស្រុង នៅភូមិរស្មីសង្ហារ ឃុំរស្មីសង្ហារ ស្រុករតនមណ្ឌល ខេត្តបាត់ដំបង។
តាមប្រភពបានឱ្យដឹងថា ក្រោយបញ្ជូនមកកាន់មន្ទីរពេទ្យ អ្នកបើកបរត្រាក់ទ័រឈ្មោះ ផុន សុភី ខាងលើ ក៏បានបាត់បង់ជីវិតនៅឯមន្ទីរពេទ្យខេត្តបាត់ដំបង ចាកចោលក្រុមគ្រួសារគួរឱ្យសោកសង្រេងបំផុត៕
