ថ្មីៗនេះ អ្នកលេងបណ្តាញសង្គមហ្វេសប៊ុក បាន និង កំពុងចាប់អារម្មណ៍នឹងការចែករំលែកសារជាបន្តបន្ទាប់របស់លោកស្រី អ៊ឹង គីមលាង កូនស្រីថៅកែផលិតកម្មរស្មីហង្សមាស ក្នុងគោលបំណងបញ្ជាក់ពីកម្មសិទ្ធិបញ្ញានៃការផលិតចម្រៀង គឺជារបស់ផលិតកម្ម ១០០% បើទោះជាអ្នកច្រៀងមិនបានបន្តសហការនឹងផលិតកម្មក៏ដោយ។
ក្នុងនោះ សារដំបូង ដែលបង្ហោះឡើងដោយលោកស្រី អ៊ឹង គីមលាង ធ្វើឱ្យមានការចាប់អារម្មណ៍ខ្លាំងនោះ បានរៀបរាប់ថា៖ «បទចម្រៀងទាំងអស់ ដែលហង្សមាសបានផលិត ជាកម្មសិទ្ធិរបស់ហង្សមាស ១០០% ទោះជាតារាខ្លះ និង ក្រុមហ៊ុនព្រមព្រៀងលែងបន្តសហការជាមួយគ្នា ក៏បទចម្រៀងទាំងអស់នៅជាកម្មសិទ្ធិរបស់ក្រុមហ៊ុនហង្សមាស»។
បន្ទាប់ពីសារនោះដែរ គេក៏បានឃើញលោកស្រី អ៊ឹង គីមលាង បានបង្ហោះសារជាបន្តបន្ទាប់ទៀត ក្នុងគោលបំណងរក្សាគោលជំហរនៃការរក្សាកម្មសិទ្ធិបញ្ញានៃបទចម្រៀង ព្រមទាំងបានបង្ហាញពីអារម្មណ៍ខកចិត្ត ខណៈដែលមិនទទួលបានការឱ្យតម្លៃក្នុងនាមជាផលិតកម្ម ដែលបណ្តុះបណ្តាលដល់តារាចម្រៀងឱ្យមានភាពល្បីល្បាញ៕
