នៅព្រឹកថ្ងៃទី ១៧ ខែឧសភា ឆ្នាំ ២០២៥ នេះ ឧត្តមសេនីយ៍ឯក ជួន ណារិន្ទ អគ្គស្នងការរង និង ជាស្នងការដ្ឋាននគរបាលរាជធានីភ្នំពេញ បានបំភ្លឺករណីបុករះឱ្យបានដឹងថា ប៉ុន្មានថ្ងៃនេះ មានការជជែកវែកញែកច្រើន លើករណីគ្រោះថ្នាក់ចរាចរណ៌ កាលពីរសៀលថ្ងៃទី ១៥ ខែឧសភា ឆ្នាំ ២០២៥ មុខក្រសួងមហាផ្ទៃ ធ្វើឱ្យមានអ្នករបួសធ្ងន់ស្រាល និង បាត់បង់ជីវិត បង្កឡើងដោយនគរបាលរាជធានី ឈ្មោះ ហ៊ុន ហេង។
បច្ចុប្បន្ននេះ លោកឧត្តមសេនីយ៍ឯកបានបញ្ជាក់ពីស្ថានការណ៍ឱ្យដឹងថា ពេលនេះ ឈ្មោះ ហ៊ុន ហេង ដែលជាជនបង្ក ត្រូវបានរៀបចំនីតិវិធីបញ្ជូនទៅតុលាការនាព្រឹកនេះ ដែលក្នុងនោះក៏មានអនុវត្តនូវបទពិន័យនគរបាលជាតិកម្ពុជា បណ្ដេញចេញពីក្របខណ្ឌផងដែរ។
យ៉ាងណាមិញក្នុងករណីនេះ ឯកឧត្តមបានបញ្ជាក់ច្បាស់ៗថា ក្រោយកើតហេតុភ្លាមៗ លោកបានបញ្ជាឱ្យជំនាញ និង មូលដ្ឋាន ចុះដល់កន្លែងកើតហេតុ គឺចាត់ចែងឃាត់ខ្លួនអ្នកបង្ក សង្រ្គោះអ្នករបួស និង រៀបចំសណ្ដាប់ធ្នាប់។ ឯកឧត្តមបានបន្តថា ៖ «ច្បាប់គឺមិនបានបែកចែកវណ្ណៈនោះទេ គឺអនុវត្តន៍ដូចគ្នា ស្មើភាពគ្នា (ខ្ញុំបាទមិនដែលលើកលែងទេអ្នកប្រព្រឹត្តបទល្មើស)»៕
