សោកនាដកម្មឆេះក្លឹបកម្សាន្ត មីតណាយព្រីមៀរ កាលពីព្រឹកថ្ងៃទី ៥ ខែកុម្ភៈ ឆ្នាំ ២០២៥ កន្លងទៅ ស្ថិតនៅសង្កាត់ដង្កោ ខណ្ឌដង្កោ កន្លងទៅ បណ្ដាលឱ្យមានមនុស្សបាត់បង់ជីវិត និង រងរបួសធ្ងន់ កំពុងទទួលបានការព្យាបាលពីសំណាក់ក្រុមគ្រូពេទ្យ។
ដោយឡែក នៅថ្ងៃទី ១០ ខែកុម្ភៈ ឆ្នាំ ២០២៥ នេះ ម្ចាស់គណនី មួន ស្រីនាត ដែលត្រូវជាបងស្រីបង្កើតរបស់ជនរងគ្រោះឈ្មោះ មួន មករា ដែលជាជនរងគ្រោះម្នាក់នៅហេតុការណ៍ឆេះក្លឹបកម្សាន្តមីតណាយ បានបង្ហោះដំណឹងដ៏សោកសៅលើគណនីហ្វេសប៊ុកថា ប្អូនប្រុសជាទីស្រឡាញ់របស់នាងឈ្មោះ មួន មករា បានទទួលមរណភាពហើយ បន្ទាប់ពីទទួលបានការព្យាបាលជាច្រើនថ្ងៃនៅមន្ទីរពេទ្យ ។
ដំណឹងដ៏សោកសង្រេងរកទីបំផុតគ្មានរបស់បងស្រីជនរងគ្រោះនេះ បានធ្វើឱ្យមហាជនជាច្រើនបង្ហាញក្ដីអាណិតអាសូរ ជាពិសេសមិត្តភក្ដិ និង អ្នកស្គាល់គ្នាជិតដិតជាច្រើន បានបង្ហាញអារម្មណ៍សោកសៅ ព្រមទាំងបានចូលរួមរំលែកទុក្ខដល់ក្រុមគ្រួសារសពជាច្រើនហូរហែ ខណៈពិធីបុណ្យសពបងស្រីរបស់ជនរងគ្រោះបានបញ្ជាក់ថា នឹងរៀបចំឡើងនៅភូមិវត្តថ្មី ព្រែកដំបង ស្រុកមុខកំពូល ខេត្តកណ្ដាល។
គួរបញ្ជាក់ថា គិតមកដល់ថ្ងៃទី ១០ ខែកុម្ភៈ ឆ្នាំ ២០២៥ នេះ ចំនួនអ្នកបាត់បង់ជីវិតក្នុងហេតុការណ៍ភ្លើងឆេះក្លឹបកម្សាន្ត មីតណាយព្រីមៀរ មានចំនួន ៥ នាក់ហើយ និង អ្នករងរបួសផ្សេងទៀតកំពុងព្យាបាលនៅមន្ទីរពេទ្យ៕
