ថ្មីៗនេះ អ្នកគាំទ្រ និង តាមដានតារាចម្រៀងប្រុស ជា សុជាតិ សមាជិកក្រុមចម្រៀង «ក្មេងខ្មែរ» ច្បាស់ជាបានជ្រាបហើយ ពាក់ព័ន្ធនឹងអ្នកលេងហ្វេសប៊ុកម្នាក់បានចូលទៅបញ្ចេញមិតមិនសមរម្យពីសម្រស់របស់ភរិយា លោក ជា សុជាតិ គឺអ្នកនាង រឹម លក្ស្មី ក្រោយសម្រាលកូនប្រុសជាទីស្រឡាញ់ កាលពីពេលកន្លងមក។
ក្នុងនោះ យុវជនមួយរូបនោះ បានចូលទៅបញ្ចេញមតិក្រោមរូបភាពលោក ជា សុជាតិ បីកូនប្រុសថា៖ «បងតារាល្បី ហេតុអីមានប្រពន្ធអាក្រក់ម្ល៉េះ តែបានកូន cute យោង» ដោយការបញ្ចេញមតិនេះ បានធ្វើឱ្យអ្នកលេងបណ្តាញសង្គមហ្វេសប៊ុកជាច្រើន ចេញមកប្រតិកម្មជំនួសលោក ជា សុជាតិ និង ភរិយាជាបន្តបន្ទាប់។
ដោយឡែក នៅថ្ងៃទី ១២ ខែកុម្ភៈ ឆ្នាំ ២០២៥ នេះ ពោលគឺក្រោយសម្រាលកូនប្រុសបានជិត ១ សប្តាហ៍ អ្នកនាង រឹម លក្ស្មី ភរិយាលោក ជា សុជាតិ បានចេញមកបង្ហោះសាររៀបរាប់យ៉ាងវែងអន្លាយ ឆ្លើយតបទៅកាន់អ្នកខមមិននោះវិញប្រកបដោយចិត្តត្រជាក់។ ក្នុងនោះ អ្នកនាងបង្ហាញការមិនចាប់អារម្មណ៍ និង មិនប្រកាន់ពាក្យនោះឡើយ ពោលគឺអ្នកនាង រឹម លក្ស្មី សង្កត់ធ្ងន់ថា សម្តីនោះ គឺគ្មានតម្លៃក្នុងចិត្តអ្នកនាងទេ អ្នកនាងមិនប្រកាន់ទេ ព្រោះការលះបង់របស់អ្នកនាងមិនមែនសម្រាប់អ្នកទេ គឺសម្រាប់កូន ប្តី និង ក្រុមគ្រួសាររបស់អ្នកនាង។
មិនត្រឹមតែប៉ុណ្ណោះ អ្នកនាង រឹម លក្ស្មី បានបន្ថែមពាក្យមួយឃ្លាផ្ញើទៅកាន់អ្នកម្តាយគ្រប់រូបនៅលើពិភពលោកថា «អ្នកគឺជាមនុស្សស្រីដ៏មហិមាបំផុត អរគុណសម្រាប់ការលះបង់គ្រប់បែបយ៉ាងដើម្បីកូនៗ»៕
