សារព័ត៌មានបរទេស បានរាយការណ៍ពីករណីមួយនៅប្រទេសមីយ៉ាន់ម៉ា ដែលចោរម្នាក់តស៊ូជីកផ្លូវក្រោមដីអស់ ៩ ថ្ងៃ ដើម្បីចូលទៅលួចមាសនៅក្នុងហាងមាសមួយកន្លែងបានសម្រេច ដោយបានជាង ៤ គីឡូ។
តាមព័ត៌មានបានឱ្យដឹងថា ក្រោយពីមានការបាក់ស្រុតផ្លូវដើរកាលពីឆ្នាំ ២០២៤ កន្លងទៅ បុរសនេះក៏សង្កេតឃើញថាប្រព័ន្ធលូក្រោមដីផ្លូវដើរមានលក្ខណៈធំទូលាយដូចគ្នាទៅនឹងប្រព័ន្ធលូនៅក្នុងហាងដែរ ទើបកើតគំនិតចូលលួចមាសដោយការជីកពីខាងក្រោមទៅវិញ។ បុរសនេះបានប្រើរយៈពេល ៩ ថ្ងៃក្នុងការជីកនៅពេលយប់ ហើយលើកលែងតែពេលភ្លៀងធ្លាក់ និងពេលថ្ងៃ ព្រោះត្រូវត្រឡប់មកធ្វើការជាអ្នកលាងឡានធម្មតា។
បុរសជាចោរបានជីកទម្លុះផ្លូវពីក្រោមដី ចូលទៅក្នុងហាងបានសម្រេចនៅម៉ោងប្រហែល ៥ នាថ្ងៃទី ២៨ ខែកញ្ញា ឆ្នាំ ២០២៥ កន្លងទៅ ដោយបានយកមាសទៅអស់ជាង ៤ គីឡូ។ លុះដល់ថ្ងៃទី ១ ខែតុលា ឆ្នាំ ២០២៥ បុរសជាចោរក៏ត្រូវបានប៉ូលិសចាប់ខ្លួនបានសម្រេចខណៈកំពុងតែធ្វើការ។ តាមចម្លើយសារភាព នៅថ្ងៃបន្ទាប់ពីលួចហើយ ចោររូបនេះបានយកមាសមួយចំនួនទៅលក់ ដោយបានលុយយកទៅទិញទូរស័ព្ទមួយគ្រឿង សល់ពីនោះយកទៅលាក់ក្នុងទូខោអាវដើម្បីចាយវាយ៕
