ថ្មីៗនេះ មានករណីភ្ញាក់ផ្អើលមួយនៅតៃវ៉ាន់ ដែលមានស្រ្តីជាតារាម៉ូឌែលវ័យ ៤០ ឆ្នាំម្នាក់ កើតជំងឺដេកមិនលក់ បែរជាទៅរកគ្លីនិកកែសម្ផស្សឱ្យជួយ គ្រូពេទ្យចាក់ថ្នាំសន្លប់ឱ្យ មានអីសន្លប់បាត់មាត់អស់ ១៩ ថ្ងៃ ចុងក្រោយក៏បាត់បង់ជីវិត។
តាមព័ត៌មានបានឱ្យដឹងថា ហេតុការណ៍នេះបានកើតឡើងកាលពីថ្ងៃទី ២៥ ខែឧសភា ឆ្នាំ ២០២៥ កន្លងទៅ។ ក្នុងនោះស្រ្តីដែលជាតារាម៉ូឌែលនេះ មានឈ្មោះថា Cai Yuxin នាងបានទៅគ្លីនិកកែសម្ផស្សដ៏ល្បីល្បាញមួយនៅលើផ្លូវ Zhongxiaodong ក្នុងសង្កាត់ Da’an ទីក្រុង Taipei ដើម្បីទទួលការព្យាបាលជំងឺដេកមិនលក់។ គ្រូពេទ្យកែសម្ផស្សនៅក្នុងគ្លីនិកបានចាក់ថ្នាំសន្លប់ប្រភេទ Propofol ឱ្យនាង ដែលចាក់រួចហើយ នាងក៏ចាប់ផ្តើមប្រកាច់ និង សន្លប់បាត់មាត់តែម្តង។
នាងត្រូវបានគេបញ្ជូនទៅសង្រ្គោះនៅឯមន្ទីរពេទ្យ ហើយបើទោះបីជាក្រុមគ្រូពេទ្យខំជួយជីវិតនាងយ៉ាងណាក៏ដោយ នាងនៅតែមិនដឹងខ្លួន ពោលគឺនាងបានសន្លប់អស់ ១៤ ថ្ងៃ ហើយចុងក្រោយគ្រួសារក៏សម្រេចចិត្តដោះអុកស៊ីសែនចេញ។ ដោយឡែក ប៉ូលីសបានឆែកឆេរគ្លីនិក ដកហូតវត្ថុតាង និងសាកសួរគ្រូពេទ្យ រួមទាំងម្ចាស់គ្លីនិកផងដែរ។
ហើយករណីនេះកំពុងស្ថិតក្រោមការស៊ើបអង្កេតក្រោមបទ ទង្វើធ្វេសប្រហែសបណ្តាលឱ្យអ្នកដទៃរបួសធ្ងន់ធ្ងរ និងស្លាប់ ស្ថិតក្រោមច្បាប់ព្រហ្មទណ្ឌ និងច្បាប់វេជ្ជសាស្រ្តរបស់តៃវ៉ាន់៕
ប្រភព៖ Sanook
