នៅវេលាម៉ោង ៧:០០ នាទី ព្រឹកថ្ងៃទី ០៦ ខែសីហា ឆ្នាំ ២០២៥ នេះ អ្នកនាំពាក្យរាជរដ្ឋាភិបាល បានចេញសេចក្តីសង្ខេបព័ត៌មាន ស្តីពី « លទ្ធផលនៃការអនុវត្តបទឈប់បាញ់រវាងកម្ពុជា-ថៃ » នៅទីស្តីការគណៈរដ្ឋមន្ត្រី។
តាមរយៈសេចក្ដីសង្ខេបព័ត៌មាន អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា បានឱ្យដឹងថា បច្ចុប្បន្នភាពទីតាំងជួរមុខនៃតំបន់អានសេះ ស្ថានការណ៍នៅតំបន់អានសេះ គិតមកដល់ម៉ោង ៦:០០ នាទី ថ្ងៃទី ៦ ខែសីហា ឆ្នាំ ២០២៥ នេះ គឺសភាពការណ៍ស្ងប់ស្ងាត់។
លោកជំទាវបានគូសបញ្ជាក់ថា កងកម្លាំងកម្ពុជានៅតែបន្តព្យាយាម និង ជំរុញអោយភាគីថៃបញ្ឈប់សកម្មភាពរំលោភបំពានដែលនាំមកនូវភាពតានតឹង និង រំខានដល់ដំណើរការដោះស្រាយតាមសន្តិវិធីឆ្ពោះទៅស្ថានភាពល្អប្រសើរដូចដែលជាបំណងប្រាថ្នារបស់កម្ពុជាក្នុងការចូលរួមចំណែកដល់សន្តិភាព និង ស្ថិរភាពក្នុងតំបន់យូរអង្វែង។
អ្នកនាំពាក្យខាងលើ បានបន្ថែមថា ក្រោយពីភាគីកម្ពុជាព្យាយាមទាក់ទងទៅភាគីថៃដែលប្រចាំការនៅតំបន់អានសេះបានពិភាក្សា និង ចរចាយ៉ាងស្វិតស្វាញជាមួយភាគីថៃនៅវេលាម៉ោង ៣:១៤ នាទីរសៀល កងកម្លាំងរបស់យើងបានដឹកនាំកម្លាំងចុះរុះរើលួសបន្លាចេញ រហូតដល់ម៉ោង ៥:៣០ នាទីល្ងាចថ្ងៃទី ០៥ ខែសីហា ឆ្នាំ ២០២៥ លួសបន្លាត្រូវបានរុះរើ និង គ្រឿងចក្រថៃត្រូវបានផ្អាកការធ្វើសកម្មភាព៕
