មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការភ្ញាក់ផ្អើល និង ចែករំលែកបន្តគ្នាព្រោងព្រាត ករណីចោរលួចទូរស័ព្ទនៅម្ដុំផ្សារដេប៉ូ ថតជាប់សកម្មភាពដោយកាមេរ៉ាសុវត្ថិភាព និង ត្រូវបាននគរបាលសមត្ថកិច្ចចាប់បានភ្លាមៗផងដែរ។
ទាក់ទិនទៅនឹងរឿងនេះ តាមរយៈផេក iStore អាយស្ត័រ បានបង្ហោះវីដេអូនៅថ្ងៃទី ១១ ខែកុម្ភៈ ឆ្នាំ ២០២៥ បង្ហាញពីសកម្មភាពចោរបន្លំខ្លួនធ្វើជាអ្នកទិញ ដោយអង្គុយមើលទូរស័ព្ទ រួចបានយកមួកសុវត្ថិភាពគ្របលើអ្នកលក់ ហើយកាន់ទូរស័ព្ទ ៤ គ្រឿងរត់ចេញពីហាងភ្លាមៗតែម្ដង។ ក្នុងនោះផងដែរ ម្ចាស់ហាងខាងលើបានភ្ជាប់ជាមួយសារអរគុណដល់សមត្ថកិច្ចប៉ុស្តិ៍នរគបាលរដ្ឋបាលផ្សារដេប៉ូ ២ ដែលបានជួយសហការ និង ទទួលបានរបស់គ្រប់ចំនួនវិញ ក្រោយចាប់បានចោរដែលបានលួចទូរស័ព្ធដៃពីហាងភ្លាមៗ និង អរគុណដល់បងប្អូនប្រជាពលរដ្ឋ នៅម្តុំនោះដែលបានជួយចាប់ជនបង្ក ជាមួយសកម្មភាពចូលលួចទូរស័ព្ទក្នុងហាងផ្ទាល់ៗដោយមិនញញើត។
យ៉ាងណាមិញ នេះជាមេរៀនមួយសម្រាប់បងប្អូនអាជីវករបង្កើនការប្រុងប្រយត្ន័ឱ្យបានខ្ពស់ ចៀសវាងខូចខាតដល់ទ្រព្យសម្បត្តិ ជាពិសេសអ្នកលក់ទូរស័ព្ទតែម្ដង៕
