នៅថ្ងៃទី ២១ ខែកុម្ភៈ ឆ្នាំ ២០២៥ នេះ នាយកដ្ឋានប្រឆាំងបទល្មើសបច្ចេកវិទ្យា បានជូនដំណឹងឱ្យសាធារណជនប្រុងប្រយ័ត្ន ចំពោះការឆបោកបន្លំ PHISHING នៅក្នុង Facebook បន្ទាប់ពីសង្កេតឃើញថា មានជនអនាមិកបានបង្ហោះផ្សព្វផ្សាយ តាមប្រព័ន្ធទំនាក់ទំនងសង្គមហ្វេសប៊ុក មានខ្លឹមសារបោកបញ្ឆោត ក្នុងគោលបំណងទាញយកព័ត៌មានសម្ងាត់របស់យើង និង លួចយកគណនីនោះទៅប្រព្រឹត្តិបទល្មើសផ្សេងៗ ដោយមិនដឹងខ្លួនផងដែរ។
ក្នុងនោះ ខាងនាយកដ្ឋានបានណែនាំឱ្យប្រុងប្រយ័ត្ន ចំពោះការឆបោកបន្លំ PHISHING នេះ ដែលកាលពីថ្ងៃទី ២០ ខែកុម្ភៈ ឆ្នាំ ២០២៥ មានជនអនាមិកបានបង្ហោះសារថា ៖ «យើងសម្អាតឃ្លាំងព្រលានយន្តហោះ និង លក់ឥវ៉ាន់ដែលបាត់ក្នុងតំលៃ 8400៛ រាល់វ៉ាលី របស់យើងគឺពោរពេញទៅដោយរបស់ផ្សេងៗ និង គ្រឿងអេឡិចត្រូនិច។ ដឹកជញ្ជូនទូទាំង ប្រទេសការផ្តល់ជូនមានសុពលភាពតាមអនឡាញរហូតដល់ដាច់ខែបញ្ជាទិញដោយចុចប៊ូតុង នៅក្នុងការផ្សាយពាណិជ្ជកម្មហើយចូលទៅកាន់ទំព័រ!»៕
