ថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេស អ្នកធ្លាប់បានទស្សនារឿងភាគល្បីរបស់ស្ថានីយទូរទស្សន៍បាយ័ន «ភូមខ្ញុំស្រស់ឆើតឆាយ» ដែលល្បីខ្លាំងកាលពីអំឡុងឆ្នាំ ២០០០ មានការភ្ញាក់ផ្អើលយ៉ាងខ្លាំង ក្រោយឃើញស្ថានភាពបច្ចុប្បន្នរបស់លោក ឡុង វីរៈយុទ្ធ តួឯកប្រុសដោយមានឈ្មោះក្នុងរឿងថា នាយភូ តាមរយៈគណនីលោក អ៊ឹម ជីវ៉ា។
ក្នុងនោះដែរ លោក អ៊ឹម ជីវ៉ា បានបង្ហោះរូបភាពស្គមស្គាំង ដោយខុសប្លែកពី លោក ឡុង វីរៈយុទ្ធ កាលពីមុនយ៉ាងខ្លាំង និង បានឱ្យដឹងថា បច្ចុប្បន្ន លោក ឡុង វីរៈយុទ្ធ ធ្វើការជាអ្នករត់តុឱ្យគេនៅហាងមួយក្នុងបុរីពិភពថ្មី គួរស្រូវ ៣។
តាមរយៈសំណេររបស់លោក អ៊ឹម ជីវ៉ា បានរៀបរាប់ថា៖ «ហ៊ឺ! នាយភូ ធ្លាប់ជាតួឯកកុន ជាតារាល្បីមួយរូប ឥឡូវនេះឃើញគាត់មកធ្វើការត់តុ ធ្លាក់រូបសម្រស់ខុសឆ្ងាយពីមុន ភ្នែកស្លក់រាងស្គមស្គាំង មើលមិនចង់ស្គាល់! ហើយគាត់ក៏ណែនាំខ្លួនថា «បងខ្ញុំគឺ ឡុង វិរៈយុទ្ធ ហៅ នាយភូ ដែលជាតួឯកប្រុស ក្នុងរឿងភូមិខ្ញុំ ស្រស់ឆើតឆាយ»។ ខ្ញុំបាទ អ៊ឹម ជីវ៉ា គឺ ជួបលោក ឡុង វីរៈយុទ្ធ ហៅ នាយភូ ដោយចៃដន្យទៅហូបអីជាមួយប្អូនៗនៅហាង RK ម៉ូការថៈ បុរីពិភពថ្មីគួស្រូវ ៣! ឃើញសភាពគាត់ហើយ អាណិតណាស់ ប្តូរប្រែប្រួលអស់គ្រប់យ៉ាង ហ៊ឺ!»។
ដោយឡែក ទន្ទឹមនឹងការបង្ហោះសារ ព្រមទាំងរូបភាពរបស់លោក ឡុង វីរៈយុទ្ធ នាពេលបច្ចុប្បន្នផងនោះ លោក អ៊ឹម ជីវ៉ា ក៏បានធ្វើកិច្ចសម្ភាសសាកសួរនាំពីការបាត់មុខរបស់លោក ឡុង វីរៈយុទ្ធ ផងដែរ ដោយលោកឡុង វីរៈយុទ្ធ បានឱ្យដឹងថា «អំឡុងពេលលោកបាត់មុខដំបូងនោះ គឺលោកចាប់ផ្តើមរកស៊ី ហើយរកស៊ីបានប្រមាណ ២ ឆ្នាំ ទើបលោកចេញមកសុំគេធ្វើការនៅហាងខាងលើនេះ ដោយចំណូលមួយខែ ១៥០ ដុល្លារ»។
គួររំឭកថា លោក ឡុង វីរៈយុទ្ធ មានឈ្មោះពិតថា ឡុង សោភ័ណ្ឌ បានចាប់ផ្តើមអាជីពសិល្បៈដំបូងក្រោយពីការចូលរួមប្រកួតកម្មវិធី Freshie Girls & Boys។ កាលពីអំឡុងឆ្នាំ ២០០០ លោក ឡុង វីរៈយុទ្ធ ផ្ទុះប្រជាប្រិយភាពខ្លាំងបន្ទាប់ពីបានសម្តែងជាតួអង្គ នាយភូ ក្នុងរឿង «ភូមិខ្ញុំស្រស់ឆើតឆាយ» ជាមួយតួឯកស្រី គឺអ្នកនាង សុខ សុម៉ាវត្តី។ ក្រោយមកសាងកេរ្តិ៍ឈ្មោះបានមួយរយៈធំ លោក ឡុង វីរៈយុទ្ធ ក៏ចាប់ផ្តើមរយាល និង បាត់មុខឈឹងលើវិថីសិល្បៈតែម្តងបន្ទាប់ពីចូលរោងការកាលពីអំឡុងឆ្នាំ ២០១៩ ព្រមទាំងចេញបើកហាងរកស៊ីជាមួយនឹងភរិយា រហូតមកដល់បច្ចុប្បន្នទើបបានឃើញរូបលោកជាថ្មី៕
