នៅព្រឹកថ្ងៃទី ២៩ ខែកញ្ញា ឆ្នាំ ២០២៥ នេះ អ្នកនាំពាក្យក្រសួងសាធារណការ និង ដឹកជញ្ជូន បានបញ្ជាក់ឱ្យដឹងថា ភ្លៀងធ្លាក់ខ្លាំង និង ជាប់ៗគ្នាឥតដាច់ប៉ុន្មានថ្ងៃមកនេះ បានបណ្តាលឱ្យផ្លូវជាតិលេខ ៥៥ នៅតំបន់អន្ទង់អាំង រងការបាក់ច្រោះដីធ្លាក់លើតួផ្លូវ និង បណ្តាលឱ្យខូចខាតផ្លូវដោយអន្លើ នៅព្រឹកថ្ងៃ ២៩ ខែកញា ឆ្នាំ ២០២៥ នេះ។
ក្នុងនោះ តាមប្រភពព័ត៌មានបានបន្តឱ្យដឹងថា ក្រោយជ្រាបករណីនេះ ក្រុមការងារជំនាញផ្លូវថ្នល់ នៃមន្ទីរសាធារណការ និង ដឹកជញ្ជូន ខេត្តពោធិ៍សាត់ និង អង្គភាពពាក់ព័ន្ធក្នុងខេត្ត បានចុះទៅដល់កន្លែងនោះភ្លាមៗ ដើម្បីអន្តរាគមន៍បើកផ្លូវ ធានាការតភ្ជាប់ឡើងវិញ សម្រួលដល់ការធ្វើដំណើរពលរដ្ឋ។
យ៉ាងណាមិញ ក្នុងរដូវវស្សានេះ សូមបងប្អូនដែលធ្វើដំណើរផ្លូវឆ្ងាយ ពិសេសតំបន់ព្រៃភ្នំ សូមបង្កើនការប្រុងប្រយ័ត្នក្នុងការបើកបរ ព្រោះថារដូវកាលនេះ មានភ្លៀងធ្លាក់ច្រើន អាចជាផលរំខានក្នុងការបើកបរ អាចមានបញ្ហារអិល បញ្ហាមើលពុំឃើញច្បាស់ពីស្ថានភាពផ្លូវ និង បញ្ហាផ្សេងៗមួយចំនួនទៀតដែលអាចកើតមានឡើងជាយថាហេតុ៕
ប្រភព ៖ ទូរទស្សន៍ជាតិកម្ពុជា
