នៅថ្ងៃទី ០២ ខែមករា ឆ្នាំ ២០២៥ នេះ ក្រសួងកសិកម្ម រុក្ខាប្រមាញ់ និង នេសាទ បានចេញសេចក្តីជូនដំណឹង អំពីអំណោយផលដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេសាប នៅក្នុងភូមិសាស្ត្រខេត្តកណ្តាល និង រាជធានីភ្នំពេញ។
រដ្ឋបាលជលផល បានបញ្ជាក់ឱ្យបានដឹងថា ក្នុងរដូវនេសាទ ឆ្នាំ២០២៤-២០២៥ តាមការសង្កេត បន្ទាប់ពីខ្នើតខែមិគសិរកន្លងមកនេះ ត្រីក៏បន្តបន្លាស់ទីចេញពីបឹងទន្លេសាប បឹង ស្ទឹង និង ព្រែកនានា ចូលទន្លេសាប ទន្លេមេគង្គ និង ទន្លេបាសាក់ ដែលអំណោយផលដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេសាប នៅក្នុងភូមិសាស្ត្រខេត្តកណ្តាល និង រាជធានីភ្នំពេញ ចាប់ពីថ្ងៃទី ០២ ដល់ថ្ងៃទី ១០ ខែមករា ឆ្នាំ ២០២៥ ក្នុងករណីមេឃស្រឡះល្អ គ្មានភ្លៀងកក់ខែ ឬ មិនទទួលរងឥទ្ធិពលព្យុះភ្លៀង។
អាស្រ័យដូចនេះ សូមបងប្អូនប្រជាពលរដ្ឋដែលមានបំណងធ្វើប្រហុក ផ្អក ត្រីឆ្អើរ ឬទឹកត្រី អាចរួសរាន់អញ្ជើញទិញត្រី តាមពេលវេលា និង ទីកន្លែងដូចមានក្នុងសេចក្តីជូនដំណឹង រួមមានក្នុងភូមិសាស្ត្រខេត្តកណ្តាល និង រាជធានីភ្នំពេញ៕
សូមអានសេចក្ដីលម្អិតនៅខាងក្រោម ៖
