ថ្មីៗនេះ លើបណ្ដាញសង្គមមហាជនអ្នកគាំទ្រតាមដានរបស់តារាស្រី ឌី សូនិត្តា បានផ្ទុះការចាប់អារម្មណ៍ និង វែកញែកខ្លាំង ក្រោយពីបានឃើញតារាស្រីរូបនេះ បង្ហោះសារលើហ្វេសប៊ុកពីបញ្ហាមួយយ៉ាងក្ដៅគគុក ហាក់កំពុងនិយាយទៅកាន់មនុស្សម្នាក់ដែលបានរករឿង ច្រណែន និង គំរាមនាងទៀតផង។
ក្នុងនោះ អ្នកនាង ឌី សូនិត្តា បានបង្ហោះសារយ៉ាងវែងនិយាយទៅកាន់មនុស្សម្នាក់នោះ ដែលពុំបានសំដៅចំៗថាជាអ្នកណាឡើយ និង មិនបានបញ្ជាក់ថាមានរឿងអ្វីនឹងគ្នា ដោយគ្រាន់តែរៀបរាប់ទម្លាយជុំវិញបញ្ហារបស់នាងជាមួយមនុស្សម្នាក់នោះថា ៖ «បងមើល..មើល….មុខស្លូតចឹង សមឱ្យបងរករឿងដែរ? ខំប្រឹងរកលុយដោយកម្លាំងញើសឈាមខ្លួន មិនបានទៅប្រើលុយបងផង សមហ្នឹងបងច្រណែនកើតដែរ? មិនបានទៅប៉ះពាល់អ្វីដែលជារបស់បងផង សមឱ្យបងគំរាមដែរ? បងជាចោរប្លន់របស់ខ្ញុំទៅ បែរជាត្អូញត្អែរថាខ្ញុំពឹសពុល ល្បិចកល់ជាងចោរ កើតដែរ? បងគិតថាតារាថោកទាប ចុះអ្នកមិនមែនតារាសុទ្ធតែថ្លៃថ្នូរកើតដែរ? យករបស់គេទៅប្រើស្រួលហើយ ម្តេចមិនសំងំធ្វើជាកល់ស្ត្រីឱ្យបានយូតិចទៅ ក្រែងរបស់នោះនៅបានយូរ។
ហើយបើបងខ្លាំងដូចមាត់ មានសច្ចៈនៅសល់ក្នុងខ្លួនខ្លះ មកជួបខ្ញុំតទល់ដាក់គ្នាម្តងមើល កុំពូកែតែអាខាងខ្លាំងក្រោយខ្នងរងចាំតែប្លន់គេ។ ហើយកុំគំរាមដល់ businesses ខ្ញុំ ខ្ញុំគ្មានខ្សែគ្មានខ្នងអីក្រៅពីបុណ្យបាបទេ (សច្ចៈ ខន្តី កតញ្ញូ ) យុគ៩ផង អ្នកណាសាងអីទទួលហ្នឹងទៅ។ មួយជាតិនេះខ្ញុំសុំជម្រាបថា ខ្ញុំមិនដែលប្លន់របស់អ្នកណា ក្រៅតែពី Pee Luck Salon, Dy Sonita Wedding Planner និង Dy sonita Branding Shop ប្រាថ្នាសុខ ដ្បិតក្នុងខ្លួនអ្នកពោរពេញទៅដោយភ្លើងទោសៈ»។
ទន្ទឹងគ្នានោះ មហាជនអ្នកលេងហ្វេសប៊ុកជាច្រើនបានផ្ទុះការចាប់អារម្មណ៍ចែករំលែក និង ចូលបញ្ចេញមតិវែកញែក ព្រមទាំងសួរនាំទៅកាន់តារាស្រី ឌី សូនិត្តា ជុំវិញរឿងរ៉ាវខាងលើជាបន្តបន្ទាប់ផងដែរ៕
