ថ្មីៗនេះ អ្នកលេងបណ្តាសញសង្គមហ្វេសប៊ុក និង Tik Tok ជាពិសេស អ្នកគាំទ្រតារាចម្រៀង លីម តិចម៉េង បានឃើញរួចមកហើយ នូវសកម្មភាពបុរសម្នាក់មានគណនីហ្វេសប៊ុក និង Tik Tok ឈ្មោះ «គុណ ពៅណា ប្រពន្ធ លីម តិចម៉េង» តែងបង្ហោះវីដេអូ និង សារក្នុងន័យជាគូស្នេហ៍ជាមួយលោក ដែលធ្វើឱ្យប៉ះពាល់ដល់កិត្តយសរបស់លោកយ៉ាងខ្លាំង។
លើសពីនោះ ម្ចាស់គណនីហ្វេសប៊ុក និង Tik Tok ខាងលើនេះ បានទៅដល់មុខផ្ទះរបស់លោកជារឿយៗ និង បង្ហោះលើ Tik Tok ដែលជាហេតុបង្កឱ្យមានការប៉ះពាល់ដល់សិទ្ធិរបស់លោកជាខ្លាំង ខណៈលោកមិនដែល ស្គាល់បុគ្គលរូបនោះឡើយ ម្យ៉ាងវិញទៀត កន្លងមក លោក លីម តិចម៉េច ធ្លាប់បានក្រើនរំឭកឱ្យបុគ្គលនោះបញ្ឈប់សកម្មភាពម្តងហើយដែរ ប៉ុន្តែបុគ្គលខាងលើនោះនៅតែបន្ត ជាហេតុធ្វើឱ្យលោក លីម តិចម៉េង ក៏បានរកមេធាវីឱ្យជួយដោះស្រាយបញ្ហាខាងលើនេះតែម្ដង។
ជាក់ស្តែង នៅថ្ងៃទី ១៨ ខែកញ្ញា ឆ្នាំ ២០២៥ កន្លងទៅ លោក លីម តិចម៉េច បានបង្ហោះសេចក្តីជូនដំណឹង ដែលរៀបចំឡើងដោយមេធាវីរបស់លោក ដោយលោកនឹងទុកពេល ៤៨ ម៉ោង ឱ្យបុគ្គលរូបនោះ បើសិនជានៅតែបន្តធ្វើសកម្មភាពដដែលៗទៀត លោក និង មេធាវីនឹងអនុវត្តតាមនិតិវិធីច្បាប់។
លោក លីម តិចម៉េង បានលើកឡើងថា៖ «ជាដំបូងនេះខ្ញុំសូមអធ្យាស្រ័យ ដែលរំខានដល់ពុកម៉ែ បងប្អូននៅទូទាំងប្រទេស រំខានដល់រឿងប្រទេសជាតិរបស់ខ្ញុំបាទម្នាក់ដូចគ្នា ដែលកំពុងមានបញ្ហា តែនេះជាវិធីតែមួយគត់ដែលអាចធ្វើបាន ហើយក៏ជាមេរៀនមួយដែលខ្ញុំមិនដែលជួប និង មិនចង់ជួប។ លិខិតជម្រាបជូនសាធារណៈជន ៖ ដើម្បីការពារ រក្សានៅតម្លៃ កិត្តិយស ភាពស្អាតស្អំ និង សុខសុវត្តិភាពក្នុងការរស់នៅជាឯកជនភាពក្នុងនាមជាប្រជាជនម្នាក់ ដោយសារបុគ្គលម្នាក់នេះ ដែលខ្ញុំមិនដែលស្គាល់ទាល់តែសោះកាលកន្លងមក។ នេះជាលិខិតបញ្ជាក់ និង ដាស់តឿនចុងក្រោយពីខ្ញុំបាទ បន្ទាប់ពីបានដាស់តឿនកាលកន្លងមកគ្មានប្រសិទ្ធភាព។ ក្នុងករណីបុគ្គលនៅក្នុងលិខិតនៅតែបន្តបំពាន ហើយមិនអនុវត្តតាមការស្នើសុំក្នុងលិខិតនេះទេ ក្នុងរយះពេល ៤៨ ម៉ោង សូមលោកគ្រូ អ្នកគ្រូ មេធាវី អនុវត្តតាមនីតិវិធីច្បាប់ សូមអរគុណ»៕
