សារព័ត៌មានបរទេស បានរាយការណ៍ពីករណីរបស់គូស្នេហ៍ជនជាតិអង់គ្លេសមួយគូ ដែលបានដេកស្លាប់នៅក្នុងផ្ទះលំហែមួយខ្នងក្នុងប្រទេសវៀតណាម ដោយសារតែការពុលស្រា។
តាមព័ត៌មានបានឱ្យដឹងថា គូស្នេហ៍ទាំងគូនេះ បានដេកស្លាប់នៅក្នុងបន្ទប់ផ្ទះវីឡាមួយកន្លែងនាទីក្រុងហាណូយ កាលពីថ្ងៃទី ២៦ ខែធ្នូ ឆ្នាំ ២០២៤ កន្លងទៅ ដោយលទ្ធផលការធ្វើកោសល្យវិច័យទៅលើសពបានឱ្យដឹងថា ពួកគេបានពុលសារធាតុមេតាណុល បន្ទាប់ពីផឹកស្រា limoncello រួច។
ក្នុងនោះ តាមព័ត៌មានបានឱ្យដឹងថាទៀតថា ពួកគេបានកុម្ម៉ង់ស្រា limoncello ចំនួន ២ ដបមកផឹកក្នុងថ្ងៃគ្រីស្មាសជាមួយគ្នា ហើយក្រោយពីស្រវឹង ក៏បាននាំគ្នាទៅសម្រាកគេង តែជាអកុសលក៏បានបាត់បង់ជីវិតទាំងគូ។
គួរឱ្យដឹងដែរថា គូស្នេហ៍មួយគូនេះ ទើបតែបានភ្ជាប់ពាក្យមួយខែមុនការស្លាប់នេះឯង ដោយពួកគេបានរៀបផែនការជីវិតរួចរាល់ទៅហើយ។ ដោយឡែក ខាងក្រុមគ្រួសាររបស់ជនរងគ្រោះទាំងពីរ ក៏បានអំពាវនាវឱ្យអាជ្ញាធរជួយរកមុខអ្នកលក់ចែកចាយស្រាខាងលើ ដើម្បីមកដាក់ទោសទៅតាមផ្លូវច្បាប់ផងដែរ៕
ប្រភព៖ Khaosod
