តូចសាមញ្ញ តែល្បីដល់អន្តរជាតិ! ផ្ទះឈើខ្មែររបស់ចុងភៅណាក់ ត្រូវបានសារព័ត៌មានអង់គ្លេសដ៏ល្បី បញ្ចូលក្នុងបញ្ជីសណ្ឋាគារល្អបំផុតនៅកម្ពុជា

ប្រិយមិត្តស្គាល់ ចុងភៅណាក់ ឬ Chef Nak ប្រាកដជាបានដឹងមកហើយថា ចុងភៅស្រីកម្ពុជាល្បីល្បាញដំបូងគេរូបនេះ បានបើកកន្លែងផ្តល់សេវាកម្មម្ហូបអាហារ និង ការស្នាក់នៅលក្ខណៈ​ឯកជនមួយ ដែលរៀបចំជាផ្ទះឈើខ្មែរ ស្ថិតនៅចម្ងាយប្រមាណ ៤៥ នាទី ពីទីក្រុងភ្នំពេញ។​

ជាមួយការតាក់តែងផ្ទះឈើខ្មែរ លម្អដោយគ្រឿងសិល្បៈ ផ្សារភ្ជាប់នឹងធម្មជាតិខៀវខ្ចី ចុងភៅណាក់បានរៀបចំជាកន្លែងស្នាក់ផង ចម្អិនម្ហូបផង ក៏ដូចជាកន្លែងបង្រៀនធ្វើម្ហូបផងដែរ។ ដោយសារតែលក្ខណៈពិសេសនេះហើយ ទើបផ្ទះឈើនេះ មិនត្រឹមតែលេចធ្លោក្នុងស្រុកប៉ុណ្ណោះទេ តែថែមទាំងល្បីសុសសាយដល់អន្តរជាតិផងដែរ។

ជាក់ស្តែង ថ្មីៗនេះ ផ្ទះឈើរបស់ចុងភៅណាក់ ត្រូវបានសារព័ត៌មានដ៏ល្បីរបស់អង់គ្លេស The Standard ជ្រើសរើសដាក់បញ្ចូលក្នុងបញ្ជីសណ្ឋាគារល្អបំផុតនៅកម្ពុជា។ ទន្ទឹមនឹងការចុះផ្សាយនេះ ចុងភៅណាក់ ក៏បានបង្ហាញអារម្មណ៍រំភើប ដោយបង្ហោះសារនៅលើទំព័រហ្វេសប៊ុកផងដែរ។​

ចុងភៅណាក់ បានសរសេររៀបរាប់យ៉ាងដូច្នេះថា៖ «ខ្ញុំសប្បាយចិត្តដែលផ្ទះឈើរបស់យើង ត្រូវបាន The Standard​ សារព័ត៌មានដ៏ល្បីរបស់ចក្រភពអង់គ្លេស ជ្រើសរើសបញ្ចូលក្នុងបញ្ជីសណ្ឋាគារល្អបំផុតនៅកម្ពុជា។  អ្វីដែលជាទីមោទក និង កិត្តិយសជាងនេះទៅទៀតនោះ គឺការមើលឃើញផ្ទះតូចសាមញ្ញរបស់យើង អាចឈរជាមួយសណ្ឋាគារលំដាប់ ៥–៧ ផ្កាយ។ វាជាភស្តុតាងដែលថា ម្ហូបខ្មែររបស់យើងក៏អាចឈរខ្ពស់លើឆាកអន្តរជាតិជាមួយម្ហូបអាហាររបស់ប្រទេសផ្សេងៗទៀតដែរ»៕