ផលិតកម្មបារមីចេញមុខប្រកាស ក្រោយអ្នកគាំទ្របង្ហាញការខកចិត្ត ចំពោះសិល្បករ-ការិនីក្នុងផលិតកម្មមិនសូវបង្ហាញពីបញ្ហាឈ្លានពានរបស់ចោរថៃ

ជាការពិតណាស់ ស្របពេលមហាជនអ្នកប្រើប្រាស់លើបណ្ដាញសង្គមកម្ពុជា កំពុងផ្ទុះចែករំលែកពាក់ព័ន្ធនឹងការឈ្លានពានវាយប្រហាពីខាងថៃមកលើកម្ពុជាហើយនោះ ងាកទៅកាន់សិល្បករ សិល្បការិនីក្នុងរង្វង់សិល្បៈ ក៏ដូចជា Influencer និង បុគ្គលល្បីជាច្រើន ត្រូវបានមហាជនចាត់ទុកថាជាសំឡេងដ៏ធំ ដែលអាចបង្ហាញយ៉ាងសុះសាយពីការបំពានរបស់ថៃមកកាន់កម្ពុជាទៅកាន់ពិភពលោកបានដឹងតាមរយៈបណ្តាញសង្គមនានារបស់ពួកគេ។

យ៉ាងណាមិញ ក្នុងនោះដែរ មហាជនក៏កំពុងចោទជាចម្ងល់ពីបុគ្គលល្បីៗមួយចំនួនដែលស្ងាត់មិនទាន់ឃើញចេញបង្ហោះការពារប្រទេសជាតិដែរ រហូតផ្ទុះការវែកញែកជាបន្តបន្ទាប់។

ងាកមកកាន់សិល្បករ សិល្បការិនី នៅក្នុងផលិតកម្មបារមី ក៏កំពុងតែត្រូវបានមហាជនចាប់ក្រសែភ្នែកមើលផងដែរ ដោយក្នុងចំណោមសិល្បករ សិល្បការិនីទាំងអស់ គេបានឃើញតែតារាចម្រៀងរ៉េប វណ្ណដា បានចេញមកបង្ហោះសារលើផេកផ្លូវការចំនួន ២ ដង។ រីឯអ្នកដទៃមិនសូវជាសកម្មនៅឡើយ រហូតម្នាក់ៗបង្ហាញអារម្មណ៍ខកចិត្ត ខណៈផលិតកម្មបារមីជាផលិតកម្មមួយ ដែលមានសំឡេងដ៏ធំទៅកាន់អន្តរជាតិ។

ជុំវិញការស្ងប់ស្ងាត់នោះដែរ នៅរសៀលថ្ងៃទី ២៥ ខែកក្កដា ឆ្នាំ ២០២៥ នេះ តាមរយៈផេកផ្លូវការរបស់ផលិតកម្មបារមីបានបង្ហោះសារនៅលើ Story ឱ្យដឹងថា ៖ «ជម្រាបសួរពុកម៉ែបងប្អូន! នៅពេលប៉ុន្មានម៉ោងខាងមុខនេះ សិល្បករ សិល្បការិនី និង ក្រុមការងារផលិតកម្មបារមីត្រៀមខ្លួនឡើងយន្តហោះចេញពីសហរដ្ឋអាមេរិក ត្រឡប់ទៅមាតុភូមិវិញ ហើយយើងនឹងរួមគ្នាប្រើប្រាស់សំឡេងរបស់យើង ដែលមានទាំងប៉ុន្មានឱ្យកាន់តែឮយ៉ាងពេញទំហឹងក្នុងការស្វែងរកភាពត្រឹមត្រូវមកជូនប្រទេសយើងវិញ»៕