នរណាទៅដឹងថាគ្រាន់តែសម្លាប់ពស់មួយក្បាលសោះ ក៏កើតទៅជារឿងរ៉ាវមិននឹកស្មានមួយនៅឯប្រទេសឥណ្ឌា ដោយពួកវានាំគ្នាសម្រុកចូលនៅក្នុងផ្ទះកាន់តែច្រើន បង្កឱ្យក្លាយទៅជាភាពចលាចល។
រឿងរ៉ាវមួយនេះ បានកើតឡើងថ្មីៗកន្លងទៅនៅភូមិមួយឈ្មោះ Meerut រដ្ឋ Uttar Pradesh ប្រទេសឥណ្ឌា។ ក្នុងនោះ ដំបូងឡើយ មានពស់មួយក្បាលប្រវែងប្រមាណកន្លះម៉ែត្រ បានវារចូលផ្ទះអ្នកភូមិម្នាក់ ហើយអ្នកភូមិនោះក៏បានវាយពស់នោះស្លាប់បាត់ទៅ។ បន្ទាប់មក ស្រាប់តែមានពស់ជាច្រើនក្បាលក៏បានវារចូលផ្ទះដដែលជាច្រើនក្បាល បង្កឱ្យម្ចាស់ផ្ទះកើតការភិតភ័យ ហើយបានហៅអ្នកភូមិផ្សេងៗទៀត ឱ្យមកជួយវាយ។
យ៉ាងណាមិញ អ្នកភូមិនាំគ្នាវាយពស់ស្លាប់អស់ប្រហែលជាង ៥០ ក្បាល ហើយបានយកសាកសពវាទៅកប់ក្នុងរណ្តៅតែមួយ។ ដោយឡែក ក្រោយពីរឿងរ៉ាវត្រូវបានគេចែកចាយទៅ រដ្ឋបាលព្រៃឈើបានបញ្ជូនមន្ត្រីទៅតំបន់នោះដើម្បីស៊ើបអង្កេត ហើយគេបានរកឃើញថា ពស់ដែលងាប់ទាំងនោះមិនមានពិសឡើយ និងជាសត្វព្រៃដែលកំពុងត្រូវគេការពារអភិរក្សទៀត។ អាជ្ញាធរបានធ្វើការណែនាំកុំឱ្យប្រជាជនសម្លាប់ពស់ខាងលើទៀត ព្រោះជាការខុសច្បាប់ ហើយឱ្យទាក់ទងទៅអាជ្ញាធរភ្លាមៗ បើសិនជាឃើញពួកវាចូលទៅក្នុងផ្ទះទៀត៕
ប្រភព៖ Kapook
