កន្លងទៅនេះ រឿងរ៉ាវលោកតាបស់សក់សភ្នំត្បែងម្នាក់ ត្រូវបានមហាជនខ្មែរលើកឡើងវែកញែកយ៉ាងក្ដៅគគុក បន្ទាប់ពីធ្លាយថាមានជាប់ពាក់ព័ន្ធជាមួយកំពូលតារាចម្រៀង មាស សុខសោភា។ យ៉ាងណាមិញ កាលពីថ្ងៃទី ១៦ ខែឧសភា ឆ្នាំ ២០២៥ ថ្មីៗនេះ ពោលគឺតាមរយៈផេករបស់ លោកតាសក់សភ្នំត្បែង រូបនោះ ស្រាប់តែគេឃើញមានការបង្ហោះសារយ៉ាងវែង ដោយបានចេញមកបញ្ជាក់ពីមូលហេតុមួយចំនួន ក្រោយមានការចោទប្រកាន់លើខ្លួនចំពោះរឿងរ៉ាវមួយចំនួនកន្លងទៅនេះ។
ជាក់ស្ដែងតាម ទំព័រហ្វេសប៊ុករបស់លោកតាសក់សភ្នំត្បែង បានរៀបរាប់យ៉ាងសម្អិតចំពោះរឿងរ៉ាវចោទប្រកាន់ទាំងនោះ ជាមួយការទទូចសុំយុត្តិធម៌ផងដែរថា ៖ «ដៃស្តាំរបស់ខ្ញុំ ត្រូវបាត់បង់ទាំងស្រុងដោយសារតែសង្រ្គាមនៅក្នុងសមរភូមិស្វាយចេក ក្នុងអំឡុងឆ្នាំ ១៩៨៩ ព្រោះតែការពារជាតិ ការពារទឹកដី ការពារជនប្រុសស្រីទាំងឡាយឱ្យរួចចាកផុតពីការភិតភ័យកន្លងមក។ រឿងរបស់ខ្ញុំ អស់ពីលុយម្ភៃបីម៉ឺន ឥឡូវខ្ញុំត្រូវគេចោទប្រកាន់ថាជាចោរលួចយកម៉ូតូគេរត់ទៅភ្នំត្បែង គេចោទយើងថារកសុីគ្រឿងញៀន មិនត្រឹមតែប៉ុណ្ណោះ ពួកគេបែរជួលមនុស្សមកសម្តែងដើម្បីទំលាក់កំហុសមកលើរូបយើងដោយគ្មានក្តីពិចារណា យើងចង់ដឹងណាស់ថា តើនៅលើលោកនេះ មានជនពិកាដៃស្តាំណាដែលអាចបើកម៉ូតូដៃឆ្វេងបានទេ? ហ្គែម៉ូតូនៅខាងស្តាំ ហើយខ្ញុំត្រូវពិកាដៃស្តាំទាំងស្រុង តើមានជនពិកាដៃស្តាំណា ដែលអាចបើកម៉ូតូដៃឆ្វេងបាន តើមានជនពិកាដៃស្តាំណាដែលអាចលេងហ្គីតាដៃមួយចំហៀងបានទេ? តើយកដៃណាចាប់ខ្ទង់ ដៃណាកេះហ្គីតា? ហេតុអីលោកទាំងឡាយ នាំគ្នាមកចោទប្រកាន់ទំលាក់កំហុសមកលើយើងបែបនេះទៅវិញ?»។
លោកបានបន្តទៀតថា ៖ «យើងមិនបានរត់គេចខ្លួនទៅណាទេ យើងរង់ចាំអ្នកច្បាប់ចេញដីកាកោះហៅទៅបំភ្លឺគ្រប់ពេល។ ខ្ញុំមិនបានរត់គេចពីសច្ចធម៌នោះទេ? សង្ឃឹមថាអស់លោកអ្នកមានបុណ្យគ្រប់រូបតាមបណ្តាស្ថាប័នរដ្ឋ ដែលមានតួនាទីដឹកនាំផ្លូវលោក មេត្តាជួយស្រាវជ្រាវរកការពិត រកយុត្តិធម៌ដល់រូបខ្ញុំផងទៅចុះ។ ម្នាក់ៗនាំគ្នាយករូបថតយើងតាំងពីអតីតកាលមុនពេលបួស មកធ្វើជាបច្ចុប្បន្នភាពដើម្បីបំពុលសង្គម មិនត្រឹមតែប៉ុណ្ណោះចោទយើងថាជាគ្រូអាគម យើងសូមជម្រាបទៅលោកទាំងឡាយថា ការបដិបត្តិធម៌របស់យើងក្នុងពេលកំពុងបួស គឺយើងយកតែការសមាធិជាគោល ក្នុងការឈ្វេងយល់ធម៌ប៉ុណ្ណោះ មិនបានរៀនវិជ្ជាតិរិច្ឆានណា ដែលនាំឱ្យប៉ះពាល់ដល់សតិបញ្ញារបស់មនុស្សឡើយ។ យើងមិនចង់និយាយអ្វីច្រើនទេ បើខ្ញុំនៅតែប្រព្រឹត្តអំពើល្អ មានគុណធម៌ ដូច្នេះសច្ចធម៌នៅតែជាអាវុធការពារយើងជានិច្ច»៕
