នៅវេលាម៉ោង ០៧:០០ ព្រឹក ព្រឹកថ្ងៃទី ០៤ ខែសីហា ឆ្នាំ ២០២៥ នេះ អ្នកនាំពាក្យរាជរដ្ឋាភិបាល បានចេញសេចក្តីសង្ខេបព័ត៌មាន ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅទីស្តីការគណៈរដ្ឋមន្ត្រី។
តាមរយៈសេចក្ដីសង្ខេបព័ត៌មាន លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានបញ្ជាក់ឱ្យបានដឹងថា ចាប់ពីម៉ោង ០០ មកដល់ម៉ោង ៦:១០ នាទីព្រឹកថ្ងៃទី ៤ ខែសីហា ឆ្នាំ ២០២៥ សភាពការនៅជួរមុខតាមបន្ទាត់ព្រំដែន ទិសខេត្តព្រះវិហារ និង ខេត្តឧត្តរមានជ័យ មានសភាពស្ងប់ស្ងាត់ ហើយកងទ័ពប្រុងជើងការណ៍ខ្ពស់ ក្នុងការអនុវត្តន៍យ៉ាងម៉ឺងម៉ាត់ ក្នុងតួនាទីរបស់ខ្លួន។
ក្នុងនោះផងដែរ អ្នកនាំពាក្យក្រសួងការពារជាតិកម្ពុជា លោកជំទាវឧត្តមសេនីយ៍ឯក ម៉ាលី សុជាតា បានបញ្ជាក់ឱ្យដឹងថា មកទល់នឹងព្រឹកថ្ងៃទី ៤ ខែសីហា ឆ្នាំ ២០២៥ នេះ ភាគីថៃមិនទាន់ប្រគល់កងទ័ពកម្ពុជាដែលនៅសល់ចំនួន ១៨ នាក់នៅឡើយទេ៕
