ក្លាយជាប្រពន្ធចុងមិនដឹងខ្លួន! រៀបការបានមួយឆ្នាំ ទើបដឹងប្តីបន្លំឯកសារថានៅកំលោះ តាមពិតមានប្រពន្ធកូនរួចហើយ

មានរឿងរ៉ាវរបស់នារីជនជាតិឥណ្ឌូនេស៊ី វ័យ ២៣ ឆ្នាំម្នាក់ កំពុងតែធ្វើឱ្យមហាជនចាប់អារម្មណ៍ ដោយនាងបានរៀបការហើយមួយឆ្នាំទើបដឹងថាប្តីបន្លំឯកសារបោកប្រាស់នាងថានៅលីវ ទាំងដែលការពិតមានកូនមានប្រពន្ធរួចហើយ ធ្វើឱ្យនាងក្លាយប្រពន្ធចុងដោយមិនដឹងខ្លួន។

តាមព័ត៌មានបានឱ្យដឹងថា នាងបានស្គាល់បុរសខាងលើនៅក្នុងឆ្នាំ ២០២៣ ហើយក៏បានរៀបការជាមួយគ្នានៅក្នុងខែកញ្ញា ឆ្នាំ ២០២១។ លុះក្រោយមកនាងក៏សម្រាលបានកូនម្នាក់ ហើយក៏បានទៅចុះសំបុត្រកំណើតឱ្យកូន ដោយបានធ្វើការបញ្ជាក់ទីលំនៅផងដែរ តែចៃដន្យនាងមិនឃើញឈ្មោះប្តីនាងនៅក្នុងបញ្ជីឈ្មោះប្រជាជនសោះ ធ្វើឱ្យនាងសង្ស័យជាខ្លាំង រួចក៏ធ្វើការពិនិត្យមើលបន្ថែម ទើបដឹងថាតាមពិតទៅប្តីនាងមានប្រពន្ធមានកូនរួចទៅហើយ។

ប្តីរបស់នាងបានបន្លំឯកសារមកបោកប្រាស់នាងច្រើនណាស់ មានទាំងអត្តសញ្ញាណប័ណ្ណដែលបញ្ជាក់ថានៅលីវ ព្រមទាំងសញ្ញាបត្រដែលចប់មកពីសកលវិទ្យាល័យល្បី ហើយជាពិសេសនោះគេមិនបានធ្វើការរាជការដូចដែលប្រាប់នាងឡើយ តាមពិតទៅគេគ្រាន់តែជាអ្នកជួសជុលម៉ាស៊ីនបោកខោអាវប៉ុណ្ណោះ។ កន្លងមកគេមិនដែលនាំនាងទៅជួបគ្រួសារគេឡើយ សូម្បីតែលុយរៀបការក៏នាងចេញទាំងអស់ដែរ ហើយក្រោយពីដឹងខ្លួនថាត្រូវគេបោក នាងក៏បានដាក់ពាក្យបណ្តឹងសុំលែងលះ និង ការបន្លំឯកសារផងដែរ៕

ប្រភព៖ Khaosod