អ្នកគាំទ្រនិយមតាមដានពីពិធីករមានប្រជាប្រិយភាព លោក ទ្រីវ ដេវិដ ច្បាស់ជាបានជ្រាបហើយ កាលពីថ្ងៃទី ១៦ ខែកញ្ញា ឆ្នាំ ២០២៥ កន្លងទៅ លោកបានផ្តល់ដំណឹងពីការផ្អាកទទួលការងារមួយរយៈធំ ខណៈមានបញ្ហាសុខភាព។ ក្នុងការប្រកាសដំណឹងពីការផ្អាកការងារមួយរយៈនោះ លោក ទ្រីវ ដេវិដ ក៏មិនបានបញ្ជាក់ថា លោកមានបញ្ហាសុខភាពផ្នែកអ្វីនោះឡើយ ដែលធ្វើឱ្យអ្នកគាំទ្រ និង មិត្តភក្តិជាច្រើនបានបង្ហាញការព្រួយបារម្ភដល់លោកយ៉ាងខ្លាំង។
បើទោះជាមិនបានប្រាប់ពីស្ថានភាពសុខទុក្ខនៅពេលនេះដោយផ្ទាល់ក៏ពិតមែន ប៉ុន្តែបើតាមការបង្ហោះវីដេអូពីមិត្តភក្តិ ដែលបានទៅសួរសុខទុក្ខលោក បានឱ្យឃើញថា ពេលនេះលោក ទ្រីវ ដេវិដ កំពុងសម្រាកព្យាបាលនៅមន្ទីរ ដោយបង្ហាញអាការមិនសូវជានិយាយស្តីនោះឡើយ ដែលជាហេតុធ្វើឱ្យអ្នកគាំទ្រលើកឡើងថា លោកអាចនឹងមានបញ្ហាសុខភាពផ្នែកបំពង់កក៏ថាបាន។
យ៉ាងណាមិញ នៅថ្ងៃទី ១៩ ខែកញ្ញា ឆ្នាំ ២០២៥ នេះ លោក ដេវិដ បានជម្រាបពីស្ថានភាពជំងឺរបស់លោកយ៉ាងច្បាស់ហើយ ដោយលោកត្រូវធ្វើការវះកាត់ដុះសាច់បំពង់ក ក៏ព្រោះករណីរបស់លោក គឺដុះសាច់ធំ ដូច្នេះបើទុកយូរអាចគ្រោះថ្នាក់បំផុត ប៉ុន្តែពេលនេះ លោកក៏បានវះកាត់រួចរាល់ហើយដែរ និង កំពុងបន្តសម្រាបកព្យាបាលនៅមន្ទីរពេទ្យ។
ក្រោយទទួលបានដំណឹងជំងឺច្បាស់លាស់របស់ លោក ដេវិដ ហើយនោះ អ្នកគាំទ្រក៏កាន់តែបង្ហាញក្តីបារម្ភដល់លោក ដោយបំពង់ក គឺជាកន្លែងសំខាន់នៃអាជីពជាពិធីករ។ យ៉ាងណាមិញ អ្នកគាំទ្រសង្ឃឹមថា លោកនឹងឆាប់ជាសះស្បើយ ព្រមទាំងបានវិលចូលសិល្បៈឆាប់ៗវិញផងដែរ៕
សូមចុចទីនេះ ដើម្បីទស្សនាវីដេអូ៖
