ភូមិអណ្តូងឫស្សី ជាភូមិស្មូនក្អម ឆ្នាំង តំណដូនតា
បើបានទៅដល់ខេត្តកំពង់ឆ្នាំង គឺមិនត្រូវរំលងការទៅទស្សនា ភូមិអណ្តូងឫស្សី ឃុំស្រែថ្មី ស្រុករលាប្អៀរ ដែលជាទីសិប្បកម្មស្មូនក្អម ឆ្នាំង និង វត្ថុអនុស្សាវរីយ៍ តដូនតា របស់អ្នកស្រុករាប់ពាន់ឆ្នាំមកហើយនោះទេ ។
ភូមិអណ្តូងឫស្សី នៅមិនឆ្ងាយពីជើងភ្នំក្រាំងដីមាសប៉ុន្មានឡើយ ហើយនៅក្នុងភូមិ មានមណ្ឌលអភិវឌ្ឍន៍កុលាភាជន៍ចំនួន ៤ កន្លែង ដែលរៀបចំឡើង ដើម្បីអភិរក្សមុខរបរដ៏យូលង់ មួយនេះមិនឱ្យបាត់បង់ឡើយ ។
កញ្ញា កែវ ផល្លា ប្រធាន សហគមន៍ភូមិអណ្តូងឬស្សី បានឱ្យដឹងថា សហគមន៍ បាន ទទួលការឧត្ថម្ភ ពីអង្គាការ ALLEMANDE និង PRASAC ការងារស្មូនក្អម ឆ្នាំងរបស់អ្នកភូមិ អណ្តូងឫស្សីនេះគឺបានចូលរួមយ៉ាងសំខាន់ក្នុងការទាក់ទាញភ្ញៀវទេសចរជាតិ និង អន្តរជាតិឱ្យមកទស្សនា នៅលើទឹកដីខេត្តកំពង់ឆ្នាំង ។
ការស្មូនក្អម ឆ្នាំង កុលាភាជន៍ នេះក៏មានធ្វើនៅភូមិដទៃទៀតដែរ ក្នុងស្រុករលាប្អៀរ ដែលជាប្រពៃណីពីបរមបុរាណមកតាមជំនាន់នីមួយៗដោយអ្នកខ្លះធ្វើក្អម ធ្វើឆ្នាំង ជើងក្រាន ជាដើម ហើយ ការស្មូន របស់ ពួកគាត់មានលក្ខណៈសាមញ្ញ និង គួរឱ្យទាក់ទាញបំផុត គឺមិនមានឈ្នាន់ ឬ តុធាក់បង្វិលវត្ថុ ដែលត្រូវស្មូននោះឡើយ គឺគេដើរជុំវិញវត្ថុតម្កល់នៅលើដុំឈើមូលនោះ ស្មូនដីនោះតែម្តង ។
នៅទីនោះក៏មានពលរដ្ឋខ្លះបានទទួលការហ្វឹកហាត់តាមរយៈអង្គការមិនមែនរដ្ឋាភិបាល និង រដ្ឋាភិបាលនៃប្រទេស ជាមិត្តដូចជាប្រទេស សិង្ហបុរី និង ប្រទេស ជប៉ុន ជាដើម ដោយមានគម្រោងគាំទ្រ ស្តីពីការកែលម្អ គុណភាពផលិតកម្មកុលាភាជ ត្រូវបានគាំទ្រដោយថវិកា ក្រសួងមហាផ្ទៃតាមរយៈអាជ្ញាធរខេត្តកំពង់ឆ្នាំង និង ថវិកា របស់អង្គការ CLAIR Singapore ព្រមទាំងថវិការបស់អាជ្ញាធរខេត្ត តូឈីនី និង មានការគាំទ្រថវិកា របស់សមាគមន៍ សិប្បករ ស្មូនឆ្នាំង អន្តរជាតិនៅទីក្រុងម៉ាស៊ីកូប្រទេសជប៉ុនផងដែរ ។
នេះក៏ជាការទាក់ទាញមួយផងដែរ ដើម្បីលើកស្ទួយវិស័យទេសចរណ៍ របស់ខេត្ត ម្យ៉ាងវិញទៀតប្រជាជននៅភូមិអណ្តូងឫស្សី ក៏អាចទាញយកនូវប្រភពចំណូល បានពីសិប្បកម្មស្មូន នេះសម្រាប់ទ្រទ្រង់ជីវភាពរស់នៅផងដែរ ៕
ដោយ៖សុថាត់
