ពិធីបុណ្យឆ្លងសាឡុំ នៅភូមិធម្មជាតិរុនតាឯក

ភូមិធម្មជាតិរុនតាឯក ជាភូមិគំរូមួយនៅបរិវេណអង្គរ ក្រៅពីការរៀបចំសួនដំណាំតាមបែបធម្មជាតិភូមិនេះនូវមានវប្បធ៌មបុរាណៗជាច្រើនទៀតដែល អ្នកភូមិរៀបចំធ្វើ ឡើងជាប្រចាំ ។ នៅពេលនេះភូមិធម្មជាតិរុនតាឯកបាន នឹង កំពុងរៀបចំពិធីបុណ្យពុទ្ធាភិសេកឆ្លង រោងឧបោសថគារ ឬសាឡុំ សាលាបុណ្យ និង ខ្លោងទ្វារព្រះត្រៃបិដក និង គម្ពីរ សាស្រ្តាស្លឹករឹត ដែលប្រព្រឹត្តទៅនៅចុង ខែធ្នូ ឆ្នាំ២០១៧ នេះ។

ពិធីឆ្លងសមិទ្ធផលនានា នៅភូមិធម្មជាតិរុនតាឯក នឹងត្រូវរៀបចំធ្វើនៅថ្ងៃ អាទិត្យ ១៤ កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃ អាទិត្យ ទី៣១ ខែធ្នូ ឆ្នាំ២០១៧។ ម៉ោង ២ រសៀល ជួបជុំពុទ្ធបុរិស័ទជិតឆ្ងាយចូលរួមពិធីបួងសួង និងប្រុងពលី ព្រមទាំងហែដុំសីមា ប្រទក្សិណ បណ្តែតប្រទីប និងបង្ហោះគោមពេលរាត្រី ។ ម៉ោង ៤ ទៀបភ្លឺ ឈានចូលថ្ងៃទី ១៥ កើតពេញបូរមី ត្រូវនឹង ថ្ងៃទី ១ ខែមករា ឆ្នាំ ២០១៨ ពិធីថ្វាយមធុបាយាស ព្រមទាំងសូត្របទបទុមបូជាថ្វាយផ្កាចំពោះព្រះសម្មាសម្ពុទ្ ធ។ ពេលព្រឹកថ្ងៃ ដដែលពិធីថ្វាយគ្រឿងសក្ការៈផ្សេងៗ និងម៉ោង ២ រសៀល ជួបជុំព្រះភិក្ខុសង្ឃ ជាន់តារាងបញ្ចុះសីមា បន្ទាប់មកនិមន្តធម្មកថិក សម្តែងធម៌ទេសនាគ្រែបី ព្រមទាំងអានត្រៃ ។

ចំណែកពេលយប់ មានរៀបចំបណ្តែតប្រទីប និងបង្ហោះគោម បាញ់កាំជ្រួច  លុះដល់ ថ្ងៃទី ២ ខែមករា ឆ្នាំ ២០១៨ និមន្តព្រះសង្ឃចំនួន ៩៨ អង្គ ដាក់បាត្រឆ្លងកម្មវិធីបុណ្យ ជាកិច្ចបង្ហើយ និង អញ្ជើញភ្ញៀវពិសាភោជនាហារ ។ អាស្រ័យហេតុនេះគណកម្មាធិការបុណ្យសូមអញ្ជើញបងប្អូនជនរួមជាតិទាំងក្នុង និង ក្រៅប្រទេសទាំងអស់ចូលរួមក្នុង កម្មវិធី បុណ្យនេះឱ្យកាន់តែអធិកអធមថែមទៀត ៕ សុថាត់