ស្នេហា ៧ ឆ្នាំបានត្រឹមឈឺចាប់! Nychaa បន្តស្ងប់ស្ងាត់មិនចេញមុខបកស្រាយ ខណៈដំណឹងតារាប្រុស Tono លួចក្ប-ត់ចិត្តនៅតែក្ដៅគគុក

ថ្មីៗនេះ ស្នេហា ៧ ឆ្នាំរវាង តារាប្រុស Tono និង តារាស្រី Nychaa បានឈានទៅដល់ផ្លូវបញ្ចប់ ក្រោយពីមានផ្ទុះរឿងថា បានលួចក្បត់ចិត្តមានស្រីកំណាន់ចិត្តថ្មីពីក្រោយខ្នង ទាំងដែលនារីម្នាក់នោះក៏មានសង្សាររួចហើយដែរ។

រឿងរ៉ាវមួយនេះ បានផ្ទុះឡើងតាំងពីមុនថ្ងៃចូលឆ្នាំមកម៉្លេះ ដោយសង្សាររបស់នារីដែល Tono បានលួចទាក់ទងជាមួយនោះ ជាអ្នកចេញមុខទម្លាយទាំងអស់។ បុរសរូបនេះបានរៀបរាប់ឱ្យដឹងថា សង្សាររបស់ខ្លួនមានអាជីពជាម៉ូដែល និង ពិធីការិនីមួយរូប ហើយមានថ្ងៃមួយ Tono បានទាក់ទងមកនាង ហើយបបួលនាងឱ្យទៅធ្វើការជាមួយ ក្រោយពីបានស្គាល់គ្នានៅក្នុងកម្មវិធីមួយ។

បុរសរូបនេះក៏បានឱ្យសង្សារទៅធ្វើការជាមួយនឹង Tono តែក្រោយមកចរិតនាងក៏ផ្លាស់ប្តូរ លុះដល់ថ្ងៃមួយទើបចាប់បានថា Tono និង សង្សាររបស់ខ្លួនបានដើរចេញពីខុនដូរមួយកន្លែងជាមួយគ្នាទាំងកណ្តាលយប់។ បុរសនេះបានព្យាយាមជីកឫសជីកគល់សួរនារីជាសង្សារ ទើបនាងសារភាពថាទំនាក់ទំនងនាងនឹង Tono ពិតជាលើសពីអ្នករួមការងារពិតមែន ព្រមទាំងចាប់បានភស្តុតាងអ្នកទាំងពីរសាសងគ្នានៅលើឡានជាច្រើនទៀត។

យ៉ាងណាមិញ Tono បានប្រាប់ឱ្យដឹងថាខ្លួនមិនដឹងថានារីម្នាក់នោះមានសង្សារឡើយ ហើយក៏ទម្លាយថាបានឈប់ពាក់ព័ន្ធជាមួយនាងទៅហើយ។ ដោយឡែក សម្រាប់តារាស្រី Nychaa វិញ គេឃើញថាមកទល់ពេលនេះនាងមិនបាននិយាយអ្វីទាក់ទងនឹងរឿងនេះឡើយ មានតែមហាជន និង សារព័ត៌មានប៉ុណ្ណោះដែលកំពុងតែតាមដាន និង ជីកកកាយរឿងនេះយ៉ាងក្តៅគគុក៕

ប្រភព៖ Thairath