កន្លែងបង្កើតស្បូនសិប្បនិម្មិតដំបូងគេបង្អស់លើលោក EctoLife អាចបង្កកំណើតទារក ៣ ម៉ឺននាក់ក្នុងមួយឆ្នាំ
រឿងប្រឌិតបែបវិទ្យាសាស្ត្រ អាចនឹងវិវដ្តមកភាពពិតជាក់ស្ដែងហើយ ខណៈ «រោងចក្រផលិតទារក» លើកដំបូងបំផុតលើពិភពលោក ត្រូវបានប្រកាសនឹងបង្កើតឡើង។
EctoLife បច្ចេកវិទ្យាបង្កើតឡើងថ្មីដោយលោក Hashem Al-Ghaili អ្នកជំនាញផ្នែកបច្ចេកវិទ្យាជីវៈ និង អ្នកទំនាក់ទំនងផ្នែកវិទ្យាសាស្ត្រ អាចនឹងជួយសម្រួលដល់អ្នកដែលចង់បានកូន ប៉ុន្តែមិនចង់មានភាពលំបាក និង ឈឺចាប់។
តាមសារព័ត៌មាន Mirror បានឱ្យដឹងថា បច្ចេកវិទ្យា EctoLife អាចផលិត និង ចិញ្ចឹមទារកបានរហូតដល់ ៣ ម៉ឺននាក់ក្នុងមួយឆ្នាំក្នុងមន្ទីរពិសោធរបស់ពួកគេ ហើយលោក Al-Ghaili ជឿជាក់ថា កន្លែងពិសោធទាំងនេះ នឹងអាចឱ្យគូស្នេហ៍ដែលមិនអាចមានកូន អាចមានកូនជាសាច់ឈាមបង្កើតរបស់ខ្លួនឯងបាន។
លើសពីនេះទៅទៀត ពួកគេក៏មានគម្រោងផ្ដល់ជា «កញ្ចប់អភិជន» (Elite Package) ដែលអាចឱ្យអ្នកចង់បានកូន ធ្វើវិស្វកម្មហ្សែនលើអំប្រ៊ីយ៉ុង មុនយកទៅចិញ្ចឹមក្នុងស្បូនសិប្បនិម្មិត ដោយក្នុងនោះអ្នកដែលទិញកញ្ចប់នេះ អាចធ្វើការជ្រើសរើសកុម្ម៉ង់បុគ្គលិកលក្ខណៈកូនបាន រាប់ចាប់ពីភ្នែក ពណ៌សក់ រហូតដល់កម្ពស់ និង ភាពវៃឆ្លាត។
តាមការបញ្ជាក់របស់លោក Al-Ghaili បានឱ្យដឹងថា ៖«បច្ចេកវិទ្យាស្បូនសិប្បនិម្មិត EctoLife គឺបង្កើតឡើងក្នុងបំណងកាត់បន្ថយភាពឈឺចាប់ និង លំបាករបស់មនុស្សទូទៅ រួមទាំងជួយកាត់បន្ថយឱកាសនៃវះកាត់កូនផងដែរ។ ជាមួយបច្ចេកវិទ្យា EctoLife ការកើតកូនមិនគ្រប់ខែ និង ការសម្រាលកូនដោយវះកាត់ នឹងក្លាយជារឿងអតីតកាល»។ បន្ថែមពីនេះទៀត លោក Al-Ghaili ក៏បានគិតដែរ បច្ចេកវិទ្យាមួយនេះ អាចជួយបណ្ដាប្រទេសមួយចំនួន ដែលកំពុងប្រឈមនឹងអត្រាថយចំនួនប្រជាជនធ្ងន់ធ្ងរ រួមមានប្រទេសជប៉ុន កូរ៉េខាងត្បូង ជាដើម។
គួរបញ្ជាក់ផងដែរថា បច្ចេកវិទ្យា EctoLife គឺធ្វើឱ្យទារកលូតលាស់ក្នុងបរិស្ថានដ៏សុវត្ថិភាព និង ផាសុកភាពបំផុត។ ប្រអប់ ឬ ស្បូនសិប្បនិម្មិតនោះ បង្កើតឡើងដោយសារធាតុដែលបញ្ចៀសមេរោគដែលតោងជាប់ផ្ទៃខាងលើរបស់វា។ រាល់ប្រអប់ទាំងអស់ សុទ្ធតែបំពាក់ឧបករណ៍ដែលអាចតាមដានសញ្ញាចង្វាក់បេះដូង សីតុណ្ហភាព សម្ពាធឈាម ចលនាដង្ហើម និង ចលនាអុកស៊ីហ្សែន។ ជាមួយគ្នានោះដែរ ដោយសារតែទារកអាចចាប់បានភាសា និង រៀនពាក្យផ្សេងៗ ខណៈពួកគេកំពុងវិវដ្តក្នុងស្បូននោះ បច្ចេកវិទ្យា EctoLife ក៏មានរួមបញ្ជូល speakers ដែលចាក់ភ្លេងតន្ត្រី និង ឃ្លោងឃ្លាពាក្យជាច្រើនឱ្យទារកទាំងនោះស្ដាប់។ ចុងក្រោយ EctoLife ក៏មានកម្មវិធីអាចឱ្យលោកអ្នកធ្វើការច្រៀងទៅទារកដោយផ្ទាល់ ដើម្បីឱ្យពួកគេស៊ាំនឹងសំឡេងរបស់អ្នក មុនពេលពួកគេកើតឃើញពិភពលោកនេះ៕
