កប់ខ្លាំង! Xiaomi Mi Mix Alpha អេក្រង់លាត ១៨០% ឯកាមេរ៉ាទំហំ ១០៨MP

Xiaomi ទើបតែបានដាក់បង្ហាញកំពូលស្មាតហ្វូនដ៏អស្ចារ្យថ្មីរបស់ខ្លួន គឺ Mi Mix Alpha ដែកប្រើអេក្រង់ព័ទ្ធជុំវិញតួខ្លួន , កាមេរ៉ាទំហំ 108MP និង បន្ទះឈីប Qualcomm ជំនាន់ចុងក្រោយបង្អស់ ។

Mi Mix Alpha ប្រើបន្ទះឈីប Snapdragon 855+ , RAM ទំហំ 12GB , ទំហំផ្ទុក 512GB , ថាមពលថ្ម 4,050mAh ជាមួយកម្លាំងសាកល្បឿនលឿន 40W ។ អ្វីដែលអស្ចារ្យបំផុតនោះគឺ អេក្រង់ព័ទ្ធជុំវិញតួខ្លួនសរុប ១៨០% របស់វា ។

ថ្វីបើវាប្រើអេក្រង់ព័ទ្ធជុំវិញតួខ្លួន តែ Mi Mix Alpha នៅតែអាចទុកកន្លែងសម្រាប់ដាក់កាមេរ៉ាក្រោយ ដែលមានទំហំរហូតដល់ទៅ ៣ គ្រាប់ គឺ កាមេរ៉ាគោលទំហំ 108MP , កាមេរ៉ា Ultrawide ទំហំ 20MP និង កាមេរ៉ា Telephoto ទំហំ 12MP ។ វាគ្មានរន្ធបំពងសំឡេង ឬ រន្ធអ្វីផ្សេងទៀតឡើយ ហើយក៏គ្មានប៊ូតុងចុចពិតប្រាកដដែរ ខណៈសំឡេងនឹងបញ្ចេញតាមរយៈបច្ចេកវិទ្យា Display Acoustic Technology ។

Xiaomi Mi Mix Alpha មានតម្លៃខ្ទង់ ២ ៨០០ ដុល្លារ ដែលថ្លៃជាង Samsung Galaxy Fold និង Huawei Mate X ទៅទៀត ហើយនឹងចេញលក់នៅក្នុងខែធ្នូខាងមុខ ៕

ប្រភព ៖ gsmarena