Huawei Mate 30 Pro បង្ហាញខ្លួនផ្លូវការ សមត្ថភាពកាមេរ៉ារឹតតែខ្លាំង
ថ្វីបើកំពុងទទួលរងសម្ពាធដោយសារសង្គ្រាមពាណិជ្ជកម្មអាមេរិក-ចិនក្តី តែ Huawei នៅតែងើបឈរ និង បង្ហាញនូវកំពូលស្មាតហ្វូន Mate 30 និង Mate 30 Pro ជាផ្លូវការ ។
Huawei Mate 30 Pro
វាបំពាក់នូវលក្ខណៈពិសេស ក៏ដូចជាកាមេរ៉ាដ៏អស្ចារ្យបំផុតលើស្មាតហ្វូន ។ វាបានប្រើកាមេរ៉ាទំហំ 40MP Super Sensing ពី P30 Pro និង បន្ថែម កាមេរ៉ា Ultra-wide ទំហំ 40MP ដែល Huawei ហៅថា “Cine Camera” ។
ពួកវាទាំងពីរប្រើសេនស័រ 3D ToF ដូចគ្នា ។ ចំណែកឯកាមេរ៉ាទី ៣ មានទំហំ 8MP ជាមួយមុខងារ 3x Optical Zoom និង 5x Optical Hybrid Zoom ។ ទាំងកាមេរ៉ា Telephoto និង Wide Angle លើ Mate 30 Pro សុទ្ធតែមានមុខងារ Optical Image Stabilization ដូចគ្នា ។
មិនតែប៉ុណ្ណោះ កាមេរ៉ាក្រោយរបស់ Mate 30 Pro អាចថតវីដេអូបានដល់កម្រិត 40 60fps ហើយអាចថតវីដេអូបែប Slow-motion រហូតដល់ទៅ 7,680fps ក្នុងកម្រិត 720p ។ លើសពីនេះ វាអាចថត Time-lapse ក្នុងកម្រិត 4K ជាមួយមុខងារ HDR+ ។ ដោយឡែក កាមេរ៉ា Selfie ខាងមុខ គឺទំហំ 32MP ។
Mate 30 Pro មានអេក្រង់ទំហំ ៦,៥៣ អ៊ីង គែមកោង ៨៨ ដឺក្រេ ដែល Huawei ហៅវាថា “Horizon Display” លើបន្ទះ OLED បង្ហាញក្នុងកម្រិត 1,176×2,400px និង មានមុខងារ HRD ហើយមានអាវក្រោះការពារទឹកកម្រិត IP68 ទៀតផង ។
វាប្រើបន្ទះឈីប Kirin 990 ជំនាន់ចុងក្រោយបង្អស់របស់ Huawei ។ វាដំណើរការដោយ EMUI10 លើ Android 10 ។ Huawei បានអាប់ដេតបច្ចេកវិទ្យាសាកថ្មឥតខ្សែកាន់តែលឿន រហូតដល់ 27W សម្រាប់ថាមពលថ្ម 4,500mAh ខណៈការសាកថ្មប្រើខ្សែ នៅតែ 40W ដដែល ។
Mate 30 Pro ផ្តល់ជម្រើសម៉ូដែល RAM 8GB , ទំហំផ្ទុក 128GB និង 256GB ហើយអាចញាត់ថែមដល់ 256GB ទៀត ។ វាមានជម្រើស ៤ ពណ៌ គឺ ពណ៌ខ្មៅ , ពណ៌ទឹកប្រាក់ , ពណ៌ស្វាយ និង ពណ៌បៃតង ។
Huawei Mate 30 Pro ម៉ូដែល 4G នឹងមានតម្លៃខ្ទង់ ១ ២០០ ដុល្លារសម្រាប់ប្រភេទ RAM 8GB និង ទំហំផ្ទុក 256GB ។ រីឯ Mate 30 Pro ម៉ូដែល 5G នឹងមានតម្លៃខ្ទង់ ១ ៣០០ ដុល្លារ ៕
ប្រភព ៖ gsmarena
