នៅរសៀលថ្ងៃទី ១៩ ខែមីនា ឆ្នាំ ២០២៥ នេះ តាមរយៈគណនីរបស់លោក ប៊ុន ផាក ដែលមានឈ្មោះ Bun park បានបង្ហោះរូបភាពជាមួយលិខិតកោះហៅ ព្រមទាំងបានបញ្ជាក់ថា លោកនឹងចូលខ្លួនស្រាយបំភ្លឺ នៅស្នងការនគរបាលរាជធានីភ្នំពេញ តាមការអញ្ជើញរបស់ឯកឧត្តម ជួន ណារិន្ទ ស្នងការនគរបាលរាជធានី នៅព្រឹកថ្ងៃទី ២១ ខែ មីនា ខាងមុខនេះ។
បន្ថែមលើសពីនេះ លោកបានបញ្ជាក់ថា លោកនឹងធ្វើការបកស្រាយពីសំណេរដែលលោកបានបង្ហោះនៅលើបណ្តាញសង្គមកាលពីថ្ងៃ ១៥ ខែមីនា កន្លងទៅ ដែលបានបញ្ចេញមតិនៅលើបណ្តាញសង្គមថា៖ «កម្ចាត់ក្មេងទំនើង និង ចោរប្លន់ឱ្យបាន ទើបយើងអាចនិយាយបានថា យើងមានសន្តិភាព»។
គួរឱ្យដឹងផងដែរថា តាមរយៈលិខិតកោះហៅ ចុះថ្ងៃទី១៧ ខែមីនា ឆ្នាំ ២០២៥ ស្នងការដ្ឋាននគរបាលរាជធានីភ្នំពេញ បានកោះហៅឈ្មោះ ប៊ុន រស្មី ហៅ ប៊ុន ផាក ភេទប្រុស អាយុ ៣២ ឆ្នាំ ចូលខ្លួនទៅកាន់ការិយាល័យប្រឆាំងបទល្មើសបច្ចេកវិទ្យា ផែនការងារសន្តិសុខ នៃស្នងការដ្ឋាននគរបាលរាជធានីភ្នំពេញ នៅថ្ងៃទី ២១ ខែមីនា ឆ្នាំ ២០២៥ វេលាម៉ោង ៩៖៣០ នាទីព្រឹក ដើម្បីបំភ្លឺករណីបំភ្លៃព័ត៌មានមិនពិតលើបណ្ដាញទំនាក់ទំនងសង្គម៕
