នៅរសៀលថ្ងៃទី ២៨ ខែមីនា ឆ្នាំ ២០២៥ នេះ មានហេតុការណ៍អគារដែលកំពុងសាងសង់មួយកន្លែងនៅតំបន់ Chatuchak បានដួលរលំ បន្ទាប់ពីមានការរញ្ជួយដីកម្រិត ៧,៤ រ៉ិចទ័រ បានវាយប្រហារក្នុងទីក្រុងបាងកក ប្រទេសថៃ។
បើតាមការឱ្យដឹងពីសារព័ត៌មានប្រទេសថៃ Khaosod បានបញ្ជាក់ឱ្យដឹងថា ករណីស្រុតរលំអគារដែលកំពុងសាងសង់ក្នុងហេតុការណ៍រញ្ជួយដីកម្រិត ៧,៤ រិចទ័រនេះ តាមការប៉ានស្មានដំបូង គឺមានកម្មកររត់គេចខ្លួនក្នុងភាពចលាចល ហើយមានមនុស្ស ១៥ នាក់ បានរងរបួស ខណៈមានមនុស្សជាច្រើនត្រូវបានគេជឿថាជាប់ក្នុងបំណែកបាក់បែក។
គួរបញ្ជាក់ថា ទីក្រុងបាងកកមានមនុស្សរស់នៅជាង ១៧ លាននាក់ ដោយភាគច្រើនរស់នៅអាផាតមិនខ្ពស់ៗ។ អ្វីដែលគួរឱ្យស្លុតជាងនេះនោះ គ្រោះរញ្ជួយដីនេះដែរមានកម្លាំងខ្លាំងរហូតអាចឱ្យទឹកបែកខ្ជាយចេញពីអាងនៃអគារខ្ពស់ៗនៅកណ្ដាលក្រុងបាងកក។ ជាមួយគ្នានោះដែរ មនុស្សក្នុងអគារខ្ពស់ៗជាច្រើន ត្រូវបានជំរុញជម្លៀសចេញពីអគារភ្លាមៗ ខណៈអគារទាំងនោះត្រូវបានរញ្ជួយខ្លាំងក្នុងគ្រោះធម្មជាតិដ៏ខ្លាំងក្លា និង កម្រមួយនេះ៕
