កាលពីថ្ងៃទី ០៦ ខែឧសភា ឆ្នាំ ២០២៥ កន្លងទៅនេះ នៅលើបណ្តាញសង្គម Tik Tok បានបង្ហោះនូវវីដេអូជាបន្តបន្ទាប់ របស់កំពូលតារាចម្រៀងរ៉េប វណ្ណដា ដើរនៅក្នុងផ្សារលើ នាទឹកដីក្រុងព្រះសីហនុ។
ក្នុងនោះដែរ ការធ្វើដំណើរចូលទៅកាន់ផ្សារលើ ក្រុងព្រះសីហនុ លើកនេះ មិនត្រឹមតែទៅចូលលេងតូបកោសដូង របស់ឪពុកម្តាយ ដូចរាល់ដងនោះទេ ពោលគឺលោក វណ្ណដា បាននាំកំពូលតារាចម្រៀងរ៉េបជប៉ុន អ្នកនាង Awich ទៅជាមួយផងដែរ។
ក្នុងការនាំតារាចម្រៀងរ៉េប Awich ដើរមើលក្នុងផ្សារនេះដែរ មហាជនក៏បានឃើញសកម្មភាពរបស់តារាចម្រៀងរ៉េបប្រចាំប្រទេសកម្ពុជា និង តារាចម្រៀងរ៉េបប្រចាំប្រទេសជប៉ុនដ៏ល្បីឈ្មោះខាងលើ បានថតវីដេអូ និង បរិយាយខ្លះៗដែរ ដោយទំនង គឺជាសកម្មភាពថតចូលទៅក្នុងកម្មវិធីណាមួយ ប៉ុន្តែជាកម្មវិធីអ្វីនោះ គេនៅមិនទាន់ដឹងនៅឡើយទេ។
យ៉ាងណាមិញ ការទៅដល់ទឹកដីស្រុកកំណើត វណ្ណដា របស់ Awich លើកនេះដែរ លោកមិនត្រឹមតែនាំនាងដើរមើលផ្សារតែម្យ៉ាងនោះទេ ពោលគឺ វណ្ណដា ក៏បាននាំ Awich ទៅតូបកោសដូងរបស់ឪពុកម្តាយ និង បានកោសដូងឱ្យ Awich បានឃើញនូវមុខរបរ ដែលធ្លាប់បានធ្វើជាមួយគ្រួសារកាលពីមុនទៀតផង៕
សូមចុចទីនេះ ដើម្បីទស្សនាវីដេអូទី ១៖
សូមចុចទីនេះ ដើម្បីទស្សនាវីដេអូទី ២៖
