កាលពីថ្ងៃទី ២៤ ខែមីនា ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក ជាពិសេស 1st Runner Up Miss Universe Cambodia 2021 និង Miss Tourism International Cambodia 2022 កញ្ញា ឆន ស្រីណេត បានចាប់អារម្មណ៍នឹងវីដេអូមួយរបស់នាង ដែលបានបង្ហោះឡើង។
វីដេអូនោះដែរ កញ្ញា ឆន ស្រីណេត បវរកញ្ញាកម្ពុជាក្រោមរូបនេះ បានបង្ហាញអារម្មណ៍តូចចិត្ត ខណៈមានមហាជនជាច្រើន បានចូលទៅខមមិនក្រោមកិច្ចសម្ភាសមួយរបស់លោក ថាច ម៉ារ៉ា ដែលជា Top10 Mister Việt Nam 2024 និង ជាសិល្បករកម្ពុជាក្រោមថា «យួន» នៅពេលដែលគេបានឮលោកនិយាយភាសាខ្មែរមិនច្បាស់។
ក្នុងនោះ បវរកញ្ញាខាងលើ បាននិយាយថា៖ «ពួកខ្ញុំ ជាខ្មែរកម្ពុជាក្រោម ដូច្នេះតុងភាសានិយាយគឺបែបនេះ ហើយកញ្ញារស់នៅប្រទេសកម្ពុជា ៥-៦ ឆ្នាំ ទើបអាចនិយាយភាសាខ្មែរបានច្រើន តែបើបងប្អូនកម្ពុជាក្រោមសឹង ៩០% ដែលប្រើពាក្យលាយវៀតណាមខ្លះៗ ក្នុងហ្នឹង ដូចតែនឹងខ្មែរសុរិន្ទ ដែលនិយាយខ្មែរលាយភាសាថៃដែរ។ សំណាងហើយ ដែលខ្មែរកម្ពុជាក្រោមដូចកញ្ញា អាចនិយាយខ្មែរបានបែបនេះ ព្រោះនៅទីនោះអត់មានសាលា អត់មានគេបណ្តុះបណ្តាលខាងភាសាខ្មែរ មានតែតាមវត្ត ហើយសំណាង ដែលនាងខ្ញុំរក្សាបានភាសានិយាយ ទំនៀមទម្លាប់ខ្មែរ។ សម្រាប់ខ្មែរក្រោមពួកខ្ញុំ គឺពួកខ្ញុំអត់ភ្លេចកំណើតនោះទេ ទោះបីដរាបណាខ្ញុំនិយាយតុងហ្នឹងក៏ដោយ និយាយមិនសូវច្បាស់ក៏ដោយ ពួកខ្ញុំក៏មិនភ្លេចដើមកំណើតជាខ្មែរដែរ ព្រោះម៉ែឪខ្មែរ យាយតាខ្មែរទាំងអស់»។
កញ្ញា ឆន ស្រីណេត បន្តទាំងទឹកភ្នែកថា៖ «នាងមានការអន់ចិត្តដែរ ដោយសារគេហៅមួយម៉ាត់ថា យួនៗៗ តែមិនមែនទេ នៅទីនោះ វៀតណាម គេហៅខ្ញុំខ្មែរ តែនៅនេះខ្មែរគ្នាឯងហៅពួកខ្ញុំយួន ខ្ញុំមានអារម្មណ៍ថា អន់ចិត្តដែរ ធ្លាប់កើតនៅលើខ្លួនខ្ញុំដែរ ប៉ុន្តែបងប្អូនខ្លះគាត់មកពីកម្ពុជាក្រោម គាត់និយាយតុងចឹង គេចោទគាត់ថាយួន បើសិនជាបងប្អូនមានអារម្មណ៍យ៉ាងម៉េច? មានអារម្មណ៍ឈឺចាប់ណាស់ ខ្លួនជាខ្មែរ ប៉ុន្តែមកនេះគេចោទថាយូន នៅនោះគេចោទថាខ្មែរ ដូចជាកូនកំព្រាម្នាក់ចឹង នៅទីនោះគេអត់ទទួលស្គាល់ នៅទីនេះគេអត់ទទួលស្គាល់»។
ជាការពិតណាស់ កន្លងមក កញ្ញា ឆន ស្រីណេត ធ្លាប់បានបង្ហាញអារម្មណ៍ខកចិត្ត និង តូចចិត្តជាច្រើនលើកមកហើយ បន្ទាប់ពីកូនខ្មែរកម្ពុជាក្រោមដូចនាង និង អ្នកដទៃទៀតត្រូវបានរើសអើង ដោយការពិតខ្មែរកម្ពុជាក្រោម ក៏ជាជនជាតិខ្មែរដែរ៕
សូមចុចទីនេះ ដើម្បីទស្សនាវីដេអូ៖
