ភាពតានតឹងរវាងប្រទេសកម្ពុជា និង ប្រទេសថៃ មកដល់ថ្ងៃទី ២១ ខែមិថុនា ឆ្នាំ ២០២៥ នេះ នៅមិនទាន់ធូរស្រាលនៅឡើយ ទាំងបញ្ហាព្រំដែន និង ការនាំចូលបន្លែផ្លែឈើ ការកំណត់ម៉ោងបិទបើកច្រកព្រំដែន ហើយកន្លងមកថៃក៏បានគំរាមកំហែងកម្ពុជាពាក់ព័ន្ធនឹងការផ្គត់ផ្គង់អគ្គិសនី អ៊ីនធឺណេត និង បញ្ហាពលករ ជាដើម ប៉ុន្ដែកម្ពុជាបានត្រៀមខ្លួនរួចជាស្រេចក្នុងការដោះស្រាយបញ្ហាទាំងអស់នោះ។
មកដល់យប់ថ្ងៃទី ២០ ខែមិថុនា ឆ្នាំ ២០២៥ តាមរយៈគេហទំព័រហ្វេសប៊ុកផេកផ្លូវការរបស់សម្ដេចតេជោ ហ៊ុន សែន បានមានប្រសាសន៍ឱ្យដឹងថា ៖ «បក្សប្រឆាំងថៃមួយ ជូនយោបល់ទៅរាជរដ្ឋាភិបាលថៃថាឱ្យឈប់លក់ប្រេងឱ្យកម្ពុជា ដែលនឹងធ្វើឱ្យកម្ពុជាចុះចាញ់។ យើងសូមបញ្ជាក់ទៅអ្នកវិញថា យើងមិនស្លាប់ដោយសារមិននាំប្រេងពីថៃមកនោះទេ ប៉ុន្តែអ្នកដែលស្លាប់គឺក្រុមហ៊ុន PTT របស់ថៃទៅវិញទេ។ តើអ្នកចង់ឲ្យក្រុមហ៊ុនថៃ PTT ស្លាប់មែនទេ? បើចង់ សូមឱ្យអ្នកធ្វើតាមបំណងចុះ»។
នៅក្នុងការបង្ហោះដដែល សម្ដេចតេជោ ក៏បានបន្ថែមថា ៖ «ក្នុងនាមជាប្រធានគណបក្ស ខ្ញុំសូមផ្តល់យោបល់ជូនរាជរដ្ឋាភិបាលពិចារណា និង ម្ចាស់ការជាមុន ដោយបង្វែរការទិញទំនិញពីប្រទេសថៃ ដើម្បីកុំឱ្យគេមានហេតុផលគំរាមយើងតទៅទៀត និង ចំពោះមុខប្រសិនច្រកទ្វារព្រំដែនមិនទាន់កែសម្រួលឱ្យដូចដើមវិញ កម្ពុជាគួរផ្អាកការនាំចូលគ្រឿងកំប៉ុងគ្រប់ប្រភេទ តាំងពីគ្រឿងស្រវឹង ភេសជៈប៉ូវកម្លាំងគ្រប់ប្រភេទរហូតដល់ត្រីខកំប៉ុង ឬ សាច់កំប៉ុងគ្រប់ប្រភេទ ជំនួសដោយប្រើផលិតផលក្នុងស្រុក ឬផលិតផលនាំចូលពីប្រទេសផ្សេងៗក្រៅពីប្រទេសថៃ។ ប្រជាជនកម្ពុជាយើងគួរសម្លឹងមើលឱ្យឆ្ងាយ លើសពីព្រំដែនកម្ពុជា និងលើសពីឆ្នាំ ២០៣០»៕
